ធនាគារ ប្រេដ ប៊ែ​ង ខេ​ម​បូ​ឌា បើក​ដំណើរការ​សាខា​ថ្មី មួយទៀត នៅ​ខេត្តបាត់ដំបង​

បាត់ដំបង ៖ ធនាគារ ប្រេដ ប៊ែ​ង ខេ​ម​បូ​ឌា​ បាន​បើកសម្ពោធ​សាខា​ថ្មី​របស់ខ្លួន​មួយទៀត​នៅ​ខេត្តបាត់ដំបង ដែលជា​សាខា​ទី​៥ របស់​ធនាគារ​បន្ទាប់​ពី​បើក​ដំណើរការ​ការិយាល័យ​ក​ណ្តា​ល​របស់ខ្លួន នៅ​ខែមីនា ឆ្នាំ​២០១៧ សាខា​ទួលគោក នៅ​ខែសីហា ឆ្នាំ​២០១៨ សាខា​ខេត្តសៀមរាប នៅ ខែតុលា ឆ្នាំ​២០១៨ និង​សាខា​ម៉ៅ​សេទុង នៅ​ខែមករា ឆ្នាំ​២០១៩​។​

ពិធី​បើកសម្ពោធ​ជា​ផ្លូវការ ធនាគារ ប្រេដ ប៊ែ​ង ខេ​ម​បូ​ឌា សាខា​បាត់ដំបង​ដែលមាន​ទីតាំង​ស្ថិត​នៅផ្ទះ​លេខ ៣៦ និង​៣៧ ផ្លូវ​លេខ​១ ភូមិ​ព្រែក​មហាទេព សង្កាត់​ស្វាយប៉ោ ក្រុង​បាត់ដំបង​ខេត្តបាត់ដំបង បានធ្វើ​ឡើង​កាលពី ថ្ងៃ​ពុធ ទី ១០ ខែមេសា ឆ្នាំ​២០១៩​ក្រោម​ការអញ្ជើញ​ចូលរួម​ពី​សំណាក់ ឯកឧត្តមសឿម ប៊ុនរឹទ្ធិ  អភិបាលរងនៃគណៈអភិបាលខេត្តបាត់ដំបង ឯកឧត្តម​ រ័ត្ន សុវណ្ណ​នរៈ អគ្គនាយក​ត្រួតពិនិត្យ ធនាគារជាតិ​នៃ​កម្ពុជា​លោក Guillaume Perdon អគ្គនាយក​នៃ​ធនាគារ ប្រេដ ប៊ែ​ង ខេ​ម​បូ​ឌា​។​

លោកស្រី មាស គ​ន្ធា នាយិកា​គ្រប់គ្រង​បណ្តាញ​សាខា នៃ​ធនាគារ ប្រេដ ប៊ែ​ង ខេ​ម​បូ​ឌា បាន​គូសបញ្ជាក់​ឲ្យ​ដឹង​ថា ធនាគារ ប្រេដ ប៊ែ​ង ខេ​ម​បូ​ឌា​បាន​ចាក់គ្រឹះ​ដ៏​រឹងមាំ នៅ​ក្នុង​វិស័យ​ធនាគារ​នៅ​កម្ពុជា និង​រក្សា​បាន​នូវ​ការ​រីកចម្រើន​ទៅមុខ​ជា​លំដាប់​។ ការ​បន្ថែម​ទីតាំង​ថ្មី​ទាំងនេះ​គឺជា​មធ្យោបាយ​មួយ​បន្ថែមទៀត ដើម្បី​បម្រើ​ទីផ្សារ​កម្ពុជា​ឱ្យ​បាន​កាន់តែ​ប្រសើរ​ជាង​មុន​ទៀត​។​"​ការបើក​ទីតាំង​ជាច្រើន​នៅ​រាជធានី​ភ្នំពេញ​ក៏ដូចជា​នៅ​តាម​បណ្តា​ខេត្ត​សំខាន់ៗ ផ្តល់​ឱកាស​ឱ្យ​យើង​ក្នុង​ការពង្រីក​វិសាលភាព នៅក្នុង​ប្រទេស និង​ពង្រីក​សេវាកម្ម សម្រាប់​អតិថិជន​របស់​យើង​នា​ពេល​បច្ចុប្បន្ន និង​អនាគត​។ ការ​បើក​បណ្តាញ​នេះ​ គឺជា​ចំណែក​ដ៏​សំខាន់ ក្នុង​ការ​ផ្តល់​សេវាកម្ម​ធនាគារ​ដ៏​ពេញលេញ​មួយ​។ បន្ថែម​ពីលើ​កម្មវិធី​ធនាគារ​ចល័ត (Mobile App) និង​ប្រព័ន្ធ​ផ្តល់​សេវា​ធនាគារ​តាម​អ៊ីន​ធើ​ណែ​ត ទីតាំង​ថ្មីៗ​របស់​យើង​ជួយ​យើង​ក្នុង​ការ​នាំ​យក​សេវាកម្ម​ធនាគារ​កាន់តែ​កៀក​ទៅ​នឹង​អតិថិជន​របស់​យើង​។ អាទិភាព​របស់​យើង​គឺ​បំពេញ​តម្រូវការ​ផ្នែក​ធនាគារ​និង​ការផ្តល់​ប្រាក់កម្ចី តាមរយៈ​បណ្ដាញ​ដែលមាន​ទាំងអស់​"​។

លោក Olivier Klein នាយក​ប្រតិបត្តិ ក្រុម​ធនាគារ ប្រេដ គ្រុប មានប្រសាសន៍ថា ក្រុម​ធនាគារ ប្រេដ គ្រុប (BRED Group) បានដាក់​យុទ្ធសាស្ត្រ "​ធនាគារ​គ្មាន​រយៈ​ចម្ងាយ​" ចាប់តាំងពី​ឆ្នាំ 2016 តាមរយៈ​ការដាក់​ឲ្យ​ប្រើប្រាស់​នូវ "​ធនាគារ​មួយ​ដែល​នៅ​ជិត​អតិថិជន​របស់ខ្លួន ទាំង​ទីតាំង​ភូមិសាស្ដ្រ ក៏ដូចជា​ទំនាក់ទំនង ធ្វើ​យ៉ាង​ណា​ឲ្យ​ទទួល​បាន​នូវ​អ្វី​ ដែល​ល្អ​បំផុត​តាម​ដែល​ការ​ខិត​ជិត​ផ្នែក​ឌីជីថល និង​បណ្តា​សាខា​អាច​ផ្តល់​ទៅបាន​។​" ក្រុមការងារ​ប្រកបដោយ​បទពិសោធន៍​នៃ​ធនាគារ ប្រេដ ប៊ែ​ង ខេ​ម​បូ​ឌា​ នឹង​ធានា​ផ្តល់ជូន​អតិថិជន​នូវ​ជំនួយ​ហិរញ្ញវត្ថុ និង​ប្រឹក្សា​យោបល់​ដ៏​ល្អ​បំផុត សមស្រប​ទៅតាម​តម្រូវការ​របស់​ពួកគាត់​។​

ដោយឡែក លោក Guillaume Perdon អគ្គនាយក​នៃ​ធនាគារ ប្រេដ ប៊ែ​ង ខេ​ម​បូ​ឌា​ បាន​មានប្រសាសន៍ថា “​គោលបំណង​របស់​យើង​គឺ​ការ​បំបាត់​នូវ​គម្លាត និង​ផ្តល់ជូន​ប្រជាជន​កម្ពុជា នូវ​ដៃគូ​ទំនាក់ទំនង​ដែល​អាច​ទុកចិត្តបាន និង​ដែល​អាច​ពិភាក្សា​ដោយ​សេរី​ជាមួយ​បាន ពី​គម្រោង​និង​មហិច្ឆតា​របស់​ពួកគាត់​។​អ្វីដែល​សំខាន់​សម្រាប់​យើង គឺ​ធ្វើយ៉ាងណា​ដើម្បី​ឲ្យ​យើង​អាច​បម្រើ​លោកអ្នក និង​ជួយ​លោកអ្នក​ឱ្យ​រីកចម្រើន​បាន​។ ចាប់ផ្តើម​ជាមួយ ប្រេដ​រីកចម្រើន​ជាមួយ ប្រេដ​។​”

ធនាគារ ប្រេដ ប៊ែ​ង ខេ​ម​បូ​ឌា គ្រោង​នឹង​បើក​បណ្តាញ​សាខា​ថ្មីៗ​ជាច្រើន​ទៀត នៅ​រាជធានី​ភ្នំពេញ និង​នៅតាម​បណ្តា​ខេត្ត​នានា នាពេល​ឆាប់ៗ​ខាងមុខនេះ ដូចជា​នៅ​ចោមចៅ នៅ​ខែមិថុនា នៅ​ម្តុំ​ផ្សារ​អូឡាំពិក នៅ​ខែកញ្ញា និង​នៅ​ផ្លូវ ២៧១ ក្រុងភ្នំពេញ ឬ​នៅ​ក្រុងព្រះសីហនុ នៅ​ចុងឆ្នាំ ២០១៩​។ ទិសដៅ​របស់ ធនាគារ ប្រេដ ប៊ែ​ង ខេ​ម​បូ​ឌា​គឺ​បើក​សាខា​ចំនួន​២០ និង​ដាក់​ឲ្យ​ដំណើរការ​ទូ​អេ​ធី​អឹម​ចំនួន ១០០ នៅ​ចុងឆ្នាំ ២០២០ ខាងមុខនេះ​។​

គួរ​បញ្ជាក់ថា ធនាគារ ប្រេដ ប៊ែ​ង (​ខេ​ម​បូ​ឌា​) ភីអិលស៊ី (“​ធនាគារ​”) ត្រូវបាន​កាន់កាប់ 100% ដោយ​ធនាគារ BRED Banque Populaire (“BRED”) ដែលជា​ធនាគារ​សហប្រតិបត្តិ​ការ​តំបន់​របស់​បារាំង និង​បាន​ចុះបញ្ជី​នៅក្នុង​ប្រទេស​បារាំង​។ ធនាគារ​បាន​ចុះបញ្ជី​នៅក្នុង​ប្រទេស​កម្ពុជា ដែលមាន​វិញ្ញាបនបត្រ​ និង​ចេញ​ដោយ​ក្រសួងពាណិជ្ជកម្ម ​នៅ​ខែមេសា ឆ្នាំ 2016​។ ធនាគារ​បានទទួល​អាជ្ញាប័ណ្ណ​ធ្វើ​ប្រតិបត្តិការ​ធនាគារ ពី​ធនាគារជាតិ​នៃ​កម្ពុជា ​នៅខែមករា ឆ្នាំ 2017 និង​ចាប់ផ្តើម​ប្រតិបត្តិការ នៅ​ខែមីនា ឆ្នាំ 2017​។  ​ធនាគារ​មាន​ការិយាល័យកណ្ដាល នៅអគារ​លេខ 30 មហាវិថី​ព្រះ​នរោត្តម សង្កាត់​ផ្សារ​ថ្មី​3 ខណ្ឌដូនពេញ ក្រុងភ្នំពេញ ព្រះរាជាណាចក្រ​កម្ពុជា​។ ធនាគារ​មាន​បុគ្គលិក​ចំនួន 153 នាក់ គិត​ត្រឹម​ខែមករា ឆ្នាំ 2019៕​



Source: Kampuchea Thmey Daily