ពិធីបិទការប្រកួតកីឡាអុកចត្រង្គ និងកីឡាទាញព្រ័ត្រ ក្នុងឱកាសអបអរសាទរបុណ្យកំពតសង្ក្រាន្ត

Cambodia News April 17, 2019

កំពត ៖ កាលពីរសៀល ថ្ងៃចន្ទ ១១កើត ខែចេត្រ ឆ្នាំកុរ សំរឹទ្ធិស័ក ព.ស ២៥៦២ ត្រូវថ្ងៃទី១៥ ខែមេសា ឆ្នាំ២០១៩ លោក ជាវ តាយ អភិបាលនៃគណៈអភិបាលខេត្តកំពត និងលោកស្រី បានអញ្ជើញជាអធិបតីក្នុងពិធីបិទការប្រកួតកីឡាអុកចត្រង្គ និងកីឡាទាញព្រ័ត្រ ក្នុងឱកាសអបអរសាទររបុណ្យកំពតសង្ក្រាន្តឆ្នាំថ្មី។

អញ្ជើញចូលរួមក្នុងពិធីនេះរួមមាន សមាជិកក្រុមប្រឹក្សាខេត្ត លោក លោកស្រី អភិបាលរងខេត្ត លោក លោកស្រីប្រធានមន្ទីរអង្គភាពជុំវិញខេត្ត នាយក នាយករងរដ្ឋបាលខេត្ត និងយុវជន យុវនារី សរុបប្រមាណ ៥០០នាក់។

ក្នុងពិធីនេះដែរ លោក អភិបាលខេត្តកំពត បានថ្លែងការកោតសរសើរថ្លែងដោយស្មោះចំពោះ កីឡាករ កីឡាការិនីទាំងអស់ ដែលបានចូលរួមក្នុងការប្រកួតនេះ ដោយរួមគ្នាគោរពគោលការណ៍និងបទបញ្ជាបច្ចេកទេសនៃការប្រកួតកីឡាបានល្អត្រឹមត្រូវ និងមានស្មារតីស្រឡាញ់កីឡាពិតប្រាកដ ដោយទទួលស្គាល់លទ្ធផលបច្ចេកទេសស្របតាមសមត្ថភាពរបស់ខ្លួន។ ជាមួយគ្នានេះ លោកអភិបាលខេត្ត ក៏បានថ្លែងកោតសរសើរចំពោះគណៈកម្មការបច្ចេកទេសទាំងអស់ដែលបានខិតខំប្រឹងប្រែងតាំងពីថ្ងៃដំបូងរហូតថ្ងៃបញ្ចប់ ដោយយកអស់កម្លាំងកាយចិត្តមិនគិតពីការនឿយហត់ ស្តែងចេញនូវការទទួលខុសត្រូវខ្ពស់ប្រកបដោយស្មារតីយុត្តិធម៌អនុវត្តបានល្អប្រសើរតាមនិយាមបច្ចេកទេសរបស់គណៈកម្មការរៀបចំការប្រកួត និងជំរុញឲ្យការប្រកួតទាំងមូលមានដំណើរការល្អប្រសើរ ទទួលបានជោគជ័យ តាមការគ្រោងទុក៕