សៀមរាប ៖ ជនសង្ស័យជាជនជាតិប៉ាគីស្ថានម្នាក់ និងបក្ខពួក បាននាំគ្នាទៅចូលហាង ARAMARU F&B ក្នុងបុរីអាក់ខេត ហើយបានបន្លំលួចលុយ៣៤០ដុល្លាររួចគេចខ្លួនបាត់។ តែត្រូវជនរងគ្រោះប្តឹងទៅនគរបាលឲ្យឃាត់ខ្លួនបានម្នាក់។ ចំណែកម្នាក់ទៀត កំពុងស្វែងរក។
ហេតុការណ៍ឃាត់ខ្លួននេះធ្វើឡើងនៅវេលាម៉ោងប្រហែល២១និង៣០នាទី ថ្ងៃទី០៤ ខែមេសា ឆ្នាំ ២០១៩ នៅផ្លូវសុខសាន្ត ភូមិ ស្ទឹងថ្មី សង្កាត់ស្វាយដង្គំ ក្រុង/ខេត្តសៀមរាប។
លោកឧត្ដមសេនីយ៍ត្រី ជា គឹមសាន ស្នងការរងទទួលផែនអន្តោប្រវេសន៍ នៃស្នងការដ្ឋានខេត្តសៀមរាបបានឲ្យដឹងថា ការងារនេះ លោកបានចាត់ចែងឲ្យ លោកវរសេនីយ៍ឯក តូច សុគន្ធ នាយការិយាល័យស៊ើបអង្កេត និងអនុវត្តនីតិវិធី នៃស្នងការដ្ឋានខេត្តសៀមរាប ជាអ្នករៀបចំនីតិវិធី។
លោកបន្តថា ប្រតិបត្តិការនេះ នគរបាលជំនាញ បានឃាត់ខ្លួនជនបរទេសម្នាក់ ពាក់ព័ន្ធនឹងករណីអំពើលួច។ ជនសង្ស័យ ឈ្មោះ ASLAM AMJAD ភេទប្រុស អាយុ២៦ឆ្នាំ ជនជាតិ ប៉ាគីស្ថាន កាន់លិខិតឆ្លងដែនលេខ UT១៨១៦១៥១ ទិដ្ឋាការស្នាក់នៅប្រភេទទេសចរណ៍ ផុតសុពលភាពថ្ងៃទី១០ ខែមីនា ឆ្នាំ២០១៩ ស្នាក់នៅផ្ទះសំណាក់ អង្គរ ហូស្តែល ស្ថិតនៅភូមិ ស្ទឹងថ្មី សង្កាត់ ស្វាយដង្គំ ក្រុង/ខេត្តសៀមរាប។
លោកបន្តថា កាលពីវេលាម៉ោងប្រហែល១៥និង២០នាទី ថ្ងៃទី០២ ខែមេសា ឆ្នាំ២០១៩ ជនសង្ស័យនិងបក្ខពួកម្នាក់ទៀត បាននាំគ្នាទៅហាង ARAMARU F&B ស្ថិតនៅបុរីអាក់ខេត ភូមិគ្រួស សង្កាត់ ស្វាយដង្គំ ក្រុង/ខេត្តសៀមរាប ធ្វើសកម្មភាពបន្លំលួចលុយជនរងគ្រោះ(ជាជនជាតិកូរ៉េ) អស់ចំនួន ៣៤០ដុល្លារ រួចនាំគ្នាគេចខ្លួនបាត់។ រហូតដល់វេលាម៉ោងប្រហែល២០និង០០នាទី ថ្ងៃទី០៤មេសាជនរងគ្រោះ បានជួបជនសង្ស័យនៅម្តុំផ្លូវសុខសាន្ត ភូមិ ស្ទឹងថ្មី សង្កាត់ ស្វាយដង្គំ ក្រុង/ខេត្តសៀមរាប ហើយរាយការណ៍ជូនសមត្ថកិច្ចជួយអន្តរាគមន៍ និងនាំខ្លួនមកសាកសួរតែម្តង។
បច្ចុប្បន្ន ជនសង្ស័យ ត្រូវបាន លោក កើត វណ្ណារ៉េត ព្រះរាជអាជ្ញាអមសាលាដំបូងខេត្តសៀមរាបសម្រេចឲ្យឃាត់ខ្លួនបណ្ដោះអាសន្ននៅស្នងការដ្ឋាននគរបាលខេត្តសៀមរាប ដើម្បីបន្តការសាកសួរនិងរៀបចំកសាងសំណុំរឿង។ នៅព្រឹកថ្ងៃទី០៦មេសានេះ នគរបាលជំនាញ បានបញ្ជូនខ្លួនជនសង្ស័យម្នាក់នេះ មកកាន់តុលាការចាត់ការបន្ត៕
Source: Kampuchea Thmey Daily
0 Comments