អ្នកចាំទី​ក្រុម​ភ្នំពេញ​ក្រោ​ន ចង់បាន​ជ័យជម្នះ​ជូន​អ្នកគាំទ្រ​ពេល​ប៉ះ​ក្រុម​លេខ​៣​ឆ្នាំ​ចាស់​ក្រុម​វិសាខា

អ្នកចាំទី Leonardo Oliveira របស់​ក្លិប​ភ្នំពេញ​ក្រោ​ន លើកឡើងថា​រូបគេ​នឹង​ខិតខំ​ការពារ​សំណាញ់​ទី​ឲ្យ​បាន​ជាប់​នឹង​ជួយ​ក្រុម​ធ្វើ​យ៉ាង​ណា​ដើម្បី​រក​៣​ពិន្ទុ​ជូន​អ្នកគាំទ្រ​ពេល​ប៉ះ​ក្រុម​ចំណាត់ថ្នាក់​លេខ​៣​ឆ្នាំ​ចាស់​វិសាខា នៅវេលា​ម៉ោង​៦​ល្ងាច​ថ្ងៃអាទិត្យ ទី​៧ ខែមេសា ឆ្នាំ​២០១៩ ខាងមុខនេះ​ក្នុង​សប្ដាហ៍​ទី​៣​នៃ​ពានរង្វាន់​លី​គ​កំពូល​កម្ពុជា (Metfone Cambodian League 2019) លើ​ទីលាន​កីឡដ្ឋាន Smart RSN Stadium របស់ខ្លួន​។



អ្នកចាំទី​វ័យ​២២​ឆ្នាំ​រូប​នេះ​ បាន​បង្ហាញ​ទស្សនៈ​របស់ខ្លួន​មុន​ការប្រកួត​មកដល់​ថា «ខ្ញុំ​សប្បាយចិត្ត​ដែល​បាន​បង្ហាញខ្លួន​លើ​ទីលាន​ជាមួយនឹង​ការ​ឈ្នះ​កាល​ពី​ថ្ងៃ​អាទិត្យ តែ​អ្វី​ដែល​សំខាន់​នោះ​គឺ​ការប្រកួត​បន្ទាប់​ដែល​យើង​នឹង​យក​៣​ពិន្ទុ​សម្រាប់​អ្នកគាំទ្រ​»​។ ប្រកួត​ជាមួយ​ក្រុម​ភ្ញៀវ​វិសាខា នេះដែរ​មាន​ផ្សាយ​ផ្ទាល់​តាម​ប៉ុស្តិ៍​ទូរទស្សន៍ BTV News ផងដែរ​។

​អ្នកចាំទី​ជនជាតិ​ប្រេ​ស៊ី​ល រូប​នេះ​បាន​បន្ថែម​ថា «​វា​ពិតជា​ការប្រកួត​ដ៏​លំបាក​មួយ​សម្រាប់​ពួក​យើង តែ​យើង​ក៏បាន​ធ្វើការ​ហ្វឹកហាត់​ខ្លាំងក្លា​ដែរ​សម្រាប់​ការប្រកួត​នេះ ព្រោះ​គោលបំណង​ចម្បង​របស់​ពួកយើង​គឺ​៣​ពិន្ទុ​។ មួយវិញទៀត​អ្នកគាំទ្រ​ក៏​សំខាន់​ដែរ​ព្រោះ​ពួកគេ​ជា​អ្នក​ជំរុញ​ទឹកចិត្ត​ពួកយើង ពួកគេ​ជួយ​យើង​ច្រើនណាស់ ខ្ញុំ​សង្ឃឹមថា​អ្នក​ទាំងអស់គ្នា​នឹង​មក​គាំទ្រ​ការប្រកួត​នៅ​កីឡដ្ឋាន​របស់​យើង​បាន​ច្រើន​។ គាំទ្រ​ពួកយើង​ដល់ទី​បញ្ចប់ យើង​នឹង​ខ្លាំង​ទាំងអស់គ្នា​»​។

​កីឡាករ Leonardo Oliveira Tavares កើត​នៅ​ថ្ងៃទី​៤ ខែមករា ឆ្នាំ​១៩៩៦​។ រូបគេ​បានចាប់ផ្តើម​អាជីព​បាល់ទាត់​របស់​ខ្លួន​នៅ​ប្រទេស​កំណើត​ជាមួយ​ក្លិប Flamengo នៅ​ឆ្នាំ​២០០៩ ហើយ​បន្តដំណើរ​ទៅកាន់​ក្លិប Botafogo នៅ​ឆ្នាំ​២០១០ រហូតដល់​ឆ្នាំ​២០១៦ រូបគេ​បន្ត​ទៅ​កាន់​ក្លិប Porto -SC​ហើយក៏​បន្ត​ទៅលេង​នៅ​ក្លឹប Queimados នា​ឆ្នាំ​២០១៧ និង​លេង​នៅ​ក្លឹប Bacabal ឆ្នាំ​២០១៨ ថ្មីៗ​នេះ មុន​ធ្វើដំណើរ​មកកាន់​ប្រទេស​កម្ពុជា​។

សូម​បញ្ជាក់​ថា ​ក្រុម​ជើងឯក​៦​សម័យកាល​ភ្នំពេញ​ក្រោ​ន កំពុងតែ​ឈរ​ចំណាត់ថ្នាក់​លេខ​៥​បណ្តោះអាសន្ន​ក្នុងចំណោម​ក្លិប​ជា​សមាជិក​ចំនួន​១៤​ក្រុម ក្រោយ​ប្រកួត​២​លើក​ឈ្នះ​១​លើក​និង​ចាញ់​១​លើក​ពោលគឺ​ចាញ់​ក្រុម​បឹងកេត​អែ​ហ្វ​ស៊ី ៣​ទល់​២ កាលពី​ប្រកួត​បើកឆាក​និង​ឈ្នះ​លើ​ក្រុមយុវជន​សាលា​បាល់​ទាត់​ជាតិ​បាទី​ ដោយ​លទ្ធផល​២ទល់​០​ ​ក្នុង​ប្រកួត​លើក​ទី២៕

Source: Kampuchea Thmey Daily