ភ្នំពេញ ៖ បុរសម្នាក់គេមិនដឹងថា មានជំងឺប្រចាំកាយស្អីឲ្យពិតប្រាកដនោះទេ បានបាញ់សម្លាប់ខ្លួនឯង ខណៈចូលទៅបាញ់ហ្ស៊ីបក្នុងទីលានបាញ់កាំភ្លើងភ្នំពេញ របស់លោក សុខ ខេមរិន នៅក្បែរអង្គភាពតម្រួតបទបញ្ជា នៃអគ្គស្នងការដ្ឋាននគរបាលជាតិមានទីតាំង ស្ថិតនៅសង្កាត់ត្រពាំងក្រសាំង ខណ្ឌពោធិ៍សែនជ័យ កាលពីវេលាម៉ោង១១ព្រឹកថ្ងៃទី០៤ ខែមេសា ឆ្នាំ២០១៩។ ក៏ប៉ុន្តែ ខាងសមត្ថកិច្ចនិងខាងក្លឹបបាញ់កាំភ្លើងព្យាយាមលាក់កំបាំងព័ត៌មាន ទើបតែនៅព្រឹកថ្ងៃទី០៥ ខែមេសា ឆ្នាំ២០១៩នេះ ទើបបែកធ្លាយ រូបភាពខ្សែវីដេអូ តាមរយៈកាមេរ៉ាសុវត្ថិភាព គួរឲ្យរន្ធត់យ៉ាងខ្លាំង។
សមត្ថកិច្ចមូលដ្ឋាន លោកយឹម សារ៉ាន់ បានឲ្យដឹងថា លោកបានដឹងដែរ តែបានត្រឹមតែរាយការណ៍ សូម្បីតែពិនិត្យកោសល្យវិច័យ ជំនាញក្រុងមិនបានចូលទៅទេ ករណីខាងលើជំនាញខាងក្រសួង ចុះទៅពិនិត្យ កោសល្យវិច័យ។
បើតាមប្រភពពីសមត្ថកិច្ចមូលដ្ឋានថា ជនដែលធ្វើអត្តឃាតនោះឈ្មោះ កែវ សុថារិទ្ធ ភេទប្រុស អាយុ៤១ឆ្នាំ មានទីលំនៅភូមិដំណាក់ធំ១ សង្កាត់ស្ទឹងមានជ័យ១ ខណ្ឌមានជ័យ មានជម្ងឺប្រចាំកាយ មិនអាចព្យាបាលបាន។ កាលពីព្រឹកថ្ងៃកើតហេតុ ជនរងគ្រោះបានទៅជួលកាំភ្លើងបាញ់ហ្ស៊ីប នៅទីលាន៩១១ ម្តងហើយ ក៏ចេញមកវិញ លុះដល់វេលាម៉ោងកើតហេតុ បានចូលទៅជួលកាំភ្លើងខ្លី ម៉ាកឡុក នៅក្លឹបបាញ់កាំភ្លើង ទីលាន របស់លោក សុខ ខេមរិន ចំនួន៥គ្រាប់ បាញ់លើកទី១ បាញ់អស់៣គ្រាប់ សំដៅផ្ទាំងហ្ស៊ីប បាញ់លើកទី២ តម្រង់ផ្ទាំងហ្ស៊ីប១គ្រាប់ ហើយ១គ្រាប់ចុងក្រោយ លើកកាំភ្លើងបាញ់ខ្លួនឯងចំក្បាល ស្លាប់យ៉ាងរន្ធត់តែម្តង។
ទោះជាយ៉ាងណាក្តី មិនអាចសុំការបំភ្លឺ ពីខាងអ្នកគ្រប់គ្រងក្លឹប ឬម្ចាស់ក្លឹបហាត់បាញ់កាំភ្លើងបានឡើយ សូម្បីតែទៅក្បែរមិនបានផងកុំថាឡើយចូលទៅរកសួរនាំនោះ៕
Source: Kampuchea Thmey Daily
0 Comments