លោកជា ពិសី ៖ យើងត្រូវពង្រឹងសន្តិសុខក្នុងពិធីបុណ្យចូលឆ្នាំថ្មី

ភ្នំពេញ ៖ ក្នុងពិធីសូត្រមន្ត ស្វាធ្យាយជ័យន្តោ ប្រោះព្រំ សុំសេចក្ដីសុខចម្រើន កើតមានដល់មន្ត្រីខណ្ឌឫស្សីកែវគ្រប់លំដាប់ថ្នាក់ ដើម្បីអបអរសាទរពិធីចូលឆ្នាំថ្មីប្រពៃណីជាតិខ្មែរ ជិតឈានចូលមកដល់ក្នុងនាពេលខាងមុខនេះ លោក ជា ពិសី អភិបាលខណ្ឌឫស្សីកែវ បានមានប្រសាសន៍ណែនាំដល់អាជ្ញាធរគ្រប់លំដាប់ថ្នាក់និងកងកម្លាំងប្រដាប់អាវុធគ្រប់ប្រភេទ ទូទាំងខណ្ឌ ត្រូវបំពេញកាតព្វកិច្ចការពារសុវត្ថិភាពជូនប្រជាពលរដ្ឋ កុំឲ្យមានហេតុការណ៍អាក្រក់ណាមួយកើតឡើងជា យថាហេតុ។

លោក ជា ពិសី បានបញ្ជាក់ថា ការសប្បាយរបស់ប្រជាពលរដ្ឋ នៅក្នុងឱកាស នៃពិធីបុណ្យចូលឆ្នាំថ្មីប្រពៃណីជាតិនាពេលខាងមុខ គឺតម្រូវឲ្យមានការយកចិត្តទុកដាក់ខ្ពស់ពីអាជ្ញាធរមានសមត្ថកិច្ច និងកងកម្លាំងទាំងអស់នៅក្នុងខណ្ឌ ត្រូវការការពារសុខសុវត្ថិភាពជូនពួកគាត់ ដែលជាកាតព្វកិច្ចចាំបាច់ក្នុងការអនុវត្ត។

លោកបានអំពាវនាវឲ្យប្រជាពលរដ្ឋគ្រប់រូប ត្រូវគោរពច្បាប់ចរាចរណ៍កុំឲ្យមានគ្រោះថ្នាក់ចរាចរណ៍កើតឡើង ហើយមិនត្រូវនាំគ្នាលេងល្បែងគប់ទឹកដាក់គ្នា ដែលអាចបណ្ដាលឲ្យមានគ្រោះថ្នាក់ជាយថាហេតុ នៅក្នុងឱកាសពិធីបុណ្យចូលឆ្នាំថ្មីប្រពៃណីជាតិ។

ជាមួយនេះដែរ សូមបងប្អូនត្រូវប្រុងប្រយ័ត្នចំពោះភ្លើងផ្សែង ទៀន ធូប អុជទទួលទេវតាឆ្នាំថ្មី ក្នុងឱកាសបុណ្យថ្មីឱ្យជៀសវាងបានការបង្កគ្រោះអគ្គិភ័យកើតឡើង។

លោក ជា ពិសី បានក្រើនរំលឹកដល់មន្ត្រីក្រោមឱវាទ ត្រូវខិតខំបំពេញតួនាទីជាអ្នកបម្រើរាស្ត្រឲ្យបានតាមការណែនាំរបស់ថ្នាក់ជាតិ លើសេវាសាធារណៈគ្រប់ប្រភេទ ត្រូវអនុវត្តតាមតារាងកំណត់ ធ្វើឲ្យបានលឿន ប្រកបដោយតម្លាភាព និងប្រសិទ្ធភាពអាចទទួលយកបាន ដើម្បីបង្កើនជំនឿទុកចិត្ត និងភាពស្និទ្ធស្នាលរវាងប្រជាពលរដ្ឋជាមួយអាជ្ញាធរ។

លោក ជា ពិសី បានបញ្ជាក់យ៉ាងដូច្នេះ បន្ទាប់ពីធ្វើកិច្ចមនសិការព្រះរតនត្រ័យ នៅព្រឹកថ្ងៃទី១០ ខែមេសា ឆ្នាំ២០១៩ ដែល លោក ជា ពិសី និង ភរិយា ដោយមានការអញ្ជើញចូលរួមពី លោកស្រី ទូច សារ៉ុម រដ្ឋលេខាធិការក្រសួងធម្មការ និង សាសនា ព្រមទាំងមន្ត្រីក្រោមឱវាទ បានអញ្ជើញវេរប្រគេនទេយ្យវត្ថុ និងបច្ច័យប្រគេនព្រះសង្ឃ ដើម្បីឧទ្ទិសកុសលបួងសួងដល់ វិញ្ញាណក្ខន្ធបុព្វការីជនបានបាត់បង់ជីវិត និង វីរៈយុទ្ធជន យុទ្ធនារី ដែលបានបូជាអាយុជីវិតដើម្បីបុព្វហេតុជាតិមាតុភូមិ ឲ្យមកទទួលនូវកុសលផលបុណ្យ និងបានទៅកាន់ឋានសុគតិភពកុំបីឃ្លៀងឃ្លាតឡើយ ព្រមទាំងបួងសួងដល់គុណបុណ្យ ព្រះរតនត្រ័យ ទេវតាឆ្នាំថ្មី និងវត្ថុសក្ដិសិទ្ធិទាំងឡាយ ប្រទានពរជ័យ សិរីសួស្ដី បវរមហាប្រសើរ សិរីមង្គល វិបុលសុខ គ្រប់ប្រការ ជូនដល់ថ្នាក់ដឹកនាំមន្ត្រីរាជការ គ្រប់លំដាប់ថ្នាក់ទាំងអស់ ទទួលបាននូវសេចក្ដីសុខចម្រើនគ្រប់ប្រការ និង សុខភាពល្អ កម្លាំងកាយមាំមួន ដើម្បីបន្តបំពេញការងារឲ្យទទួលបានជោគជ័យជូនប្រជាពលរដ្ឋក្នុងមូលដ្ឋាន និងប្រទេសជាតិ៕