ឧត្តរមានជ័យ ៖ សមត្ថកិច្ច បានធ្វើការឃាត់ខ្លួនជនសង្ស័យ០១នាក់ នៅចំណុចសួនច្បារ ខាងមុខសាលាខេត្តឧត្តរមានជ័យ ពីបទរំលោភ លើទំនុកចិត្ត កាលពីវេលាម៉ោង១៩និង១៥នាទី ថ្ងៃទី១១ ខែមេសា ឆ្នាំ២០១៩។
លោកឧត្ដមសេនីយ៍ត្រី ឡឹក សុខា ស្នងការរងនគរបាលខេត្តបានឲ្យដឹងថា ជនសង្ស័យ ឈ្មោះ កែម វណ្ណសង់ ភេទប្រុស អាយុ២៩ឆ្នាំ រស់នៅភូមិត្រពាំងសេះ សង្កាត់គោកចកក្រុង-ខេត្តសៀមរាប បានមកស្នាក់នៅហាងខារ៉ាអូខេរស្មី ហង្សមាស ស្រុកអន្លង់វែង រយៈពេល០៤ថ្ងៃ និងបានខ្ចីម៉ូតូរបស់ជនរងគ្រោះ ឈ្មោះ ពេជ្រ បូរី ភេទស្រី ហើយបានគេខ្លួនយកម៉ូតូទៅតែម្តង។
លោកស្នងការរងនគរបាលខេត្តបានបន្តថា នៅពេលដែលចាប់ឃាត់ខ្លួនជនសង្ស័យខាងលើ យើងបានដកហូតវត្ថុតាងម៉ូតូ ម៉ាក zomer X 01គ្រឿង ពណ៌ក្រហម ពាក់ស្លាកលេខ V1.1107។
តាមការសួរចម្លើយបឋមថា វាបានខ្ចីម៉ូតូម្ដាយធម៌មករកស្រីទៅបម្រើការនៅខារ៉ាអូខេ ឲ្យម្ដាយធម៌ និងទើបមករស់នៅជាមួយម្ដាយធម៌រយៈពេល៣ទៅ៤ថ្ងៃប៉ុណ្ណោះ។
លោកស្នងការនគរបាលខេត្តបានឲ្យដឹងទៀតថា ករណីខាងលើ សមត្ថកិច្ចបានទទួលព័ត៌មានភ្លាមៗពីលោកវរសេនីយ៍ រៀម សរ ថា បានប្រទះឃើញភិនភាគម៉ូតូ និងជនសង្ស័យខាងលើនៅក្បែរមាត់បឹងស្នោ នៅពេលនោះ សមត្ថកិច្ច ក៏បានអរគុណ លោក រៀម សរ និង ប្រធានក្រុមវេនប្រចាំបញ្ជាទី២ ដែលបានផ្តល់កម្លាំងសហការផ្ទាល់ជាមួយកម្លាំងសមត្ថកិច្ចដូចគ្នា។
បច្ចុប្បន្ន ជនសង្ស័យខាងលើ សមត្ថកិច្ច កំពុងធ្វើការសាកសួរ និងកសាងសំណុំរឿងតាមនីតិវិធី៕
Source: Kampuchea Thmey Daily
0 Comments