ក្រសួងការបរទេស និងសហប្រតិបត្តិការអន្តរជាតិកម្ពុជា រៀបចំពិធីសូត្រមន្តលើករាសី ក្នុងឱកាសឆ្នាំថ្មី

ភ្នំពេញ ៖ ក្រសួងការបរទេស និងសហប្រតិបត្តិការអន្តរជាតិ កាលពីព្រឹក ថ្ងៃទី១២ ខែមេសា ឆ្នាំ២០១៩ បានរៀបចំរៀបចំពិធីសូត្រមន្តលើករាសី ក្នុងឱកាសឆ្នាំថ្មី ដែលពិធីនៅរៀបចំនៅទីស្តីការក្រសួង ក្រោមអធិបតីភាពឯកឧត្តមឧបនាយករដ្ឋមន្ត្រី ប្រាក់ សុខុន ក្រសួងការបរទេស និងសហប្រតិបត្តិការអន្តរជាតិកម្ពុជា ដោយមានការចូលរួមពីមន្ត្រីរាជការយ៉ាងច្រើន។

ពិធីកិច្ចសូត្រមន្ត ចំរើនព្រះបរិត្ត និងប្រគេនចង្ហាន់ព្រះសង្ឃនេះ គឺបានប្រព្រឹត្តទៅតាមទំនៀមទម្លាប់ព្រះពុទ្ធសាសនា ដោយមានការសម្តែងនូវរបាំជូនពរ និងរបាំត្រុដិ ដើម្បីបណ្តេញនូវឧបទ្រពចង្រៃក្នុងឆ្នាំចាស់ ហើយនាំមកនូវសិរីសួស្តី គ្រប់ប្រការជូនដល់ថ្នាក់ដឹកនាំគ្រប់លំដាប់ថ្នាក់ក្នុងក្រសួង ឲ្យមានសុខភាព ល្អបរិបូរណ៍ អាយុយឺនយូរ ប្រាជ្ញា ឈ្លាសវៃ ដើម្បីបានបន្តធ្វើកិច្ចការជូនរាជរដ្ឋាភិបាលទទួលបានជោគជ័យថ្មីៗបន្ថែមទៀតទុកជាគុណ ប្រយោជន៍សម្រាប់ប្រទេសជាតិ និងប្រជាជនកម្ពុជាតទៅ។

នៅក្នុងឱកាសនោះដែរ ឯកឧត្តមឧបនាយករដ្ឋមន្ត្រី ប្រាក់ សុខុន បានបួងសួងដល់គុណបុណ្យព្រះរតនត្រ័យកែវទាំងបី វត្ថុសក្ដិសិទ្ធិ ទាំងឡាយក្នុងលោក ទេវតារក្សាព្រះមហាស្វេតច្ឆត្រ និងទេវតាថែរក្សាទឹកដីព្រះរាជាណាចក្រកម្ពុជា ព្រមទាំងទេវតាឆ្នាំថ្មី ឆ្នាំកុរ ព្រះនាមទុង្សទេវី តាមជួយអភិបាល ប្រោះព្រំសាធុការពរជ័យគ្រប់ប្រការថ្វាយព្រះករុណា ព្រះបាទសម្ដេច នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា, សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា, សម្តេចអគ្គមហាពញាចក្រី ហេង សំរិន ប្រធានរដ្ឋសភា ព្រមទាំងថ្នាក់ដឹកនាំនៃរាជរដ្ឋាភិបាល និងមន្ត្រីរាជការទាំងអស់ បានប្រកបដោយព្រះពុទ្ធពរទាំង៤ប្រការ និងទទួលបាននូវសិរីសួស្តី ជ័យមង្គល អាយុយឺនយូរ សុខភាពល្អបរិបូរណ៍ កម្លាំងមាំមួន សេចក្តីសុខចំរើន និងសុភមង្គលកុំបីឃ្លាតឡើយ។

តាមប្រវត្តិរបាំត្រុដិ ជារបាំប្រជាប្រិយ ដ៏ពេញនិយមក្នុងស្រទាប់ប្រជាជនខ្មែរយូរលង់ណាស់មកហើយ។ ប្រជាជនខ្មែរតែងលើកយករបាំដ៏ចំណាស់មួយនេះមកសម្ដែងក្នុងឱកាសឆ្លងឆ្នាំថ្មី ដើម្បីបណ្ដេញគ្រោះឧបទ្រពចង្រៃក្នុងឆ្នាំចាស់ចេញ ដើម្បីជំនួសមកវិញនូវភាពសម្បូរសប្បាយប្រកបដោយសុភមង្គលសម្រាប់ឆ្នាំថ្មី។ របាំត្រុដិទាក់ទាញណាស់ដោយសារមានសាច់រឿងប្រទាក់គ្នាបង្កប់ដោយអត្ថន័យគួរឲ្យជក់ចិត្ត មានទាំងតួអង្គព្រាយបិសាច ព្រាន យក្ស តាមប្រមាញ់ម្រឹគ និងមានទាំងតួអង្គក្ងោកសួគ៌ អមដោយតន្ត្រីបុរាណ និងចម្រៀងរៀបរាប់ដំណើរដើមទងយ៉ាងពីរោះរណ្ដំ។

ឯកសារស្ដីពីរបាំប្រជាប្រិយខ្មែររបស់ក្រុមជំនុំទំនៀមទម្លាប់ ព្រមទាំងសមាជិកឆ្លើយឆ្លងគ្រប់ខេត្ត ដែលរៀបរៀងដោយពុទ្ធសាសនបណ្ឌិត្យ ព.ស២៥០៧ គ.ស ១៩៦៤ បានសរសេរថា របាំត្រុដិនេះមានតែក្នុងខេត្តសៀមរាប និងតំបន់ខ្លះនៃខេត្តបាត់ដំបង ត្រង់ភូមិភាគណា ដែលនៅជាប់នឹងខេត្តសៀមរាបប៉ុណ្ណោះ។ របាំនេះ មានលេងតែនៅពេលបុណ្យចូលឆ្នាំខ្មែរប៉ុណ្ណោះ ក្នុងគោលបំណងដើម្បីប្រសិទ្ធិនូវសព្ទសាធុការពរជូនដល់អ្នកស្រុក ក្នុងឱកាសឆ្នាំថ្មី។ ឯកសារដដែលថា ពាក្យ “ត្រុដិ” ជាពាក្យដើមមកពីភាសា សំស្ក្រឹតប្រែថា ផ្ដាច់ ឬកាត់ផ្ដាច់ គឺសំដៅដល់ការផ្ដាច់ឆ្នាំ ឬការផ្ដាច់ឆ្នាំចាស់ចូលទៅឆ្នាំថ្មី ប៉ុន្តែបើតាមទម្លាប់របស់អ្នកស្រុកខ្លះ គេមានលេងរបាំនេះនៅពេលប្រារព្ធពិធីសុំទឹកភ្លៀងនៅគ្រាស្រុកទេស មានការរាំងស្ងួតជាច្រើនថ្ងៃខែម្ដងៗ។

ផ្អែកលើឯកសារ នៃការស្រាវជ្រាវរបស់ក្រុមជំនុំទំនៀមទម្លាប់ខ្មែរដដែល បានលើកឡើងទៀតថា ប្រវត្តិ និងដើមកំណើត នៃរបាំត្រុដិ គឺមានប្រភពច្រើន ក្នុងនោះមានប្រភពបែបរឿងនិទាន ប្រភពបែបជំនឿអ្នកស្រុក និងប្រភពអ្នកស្រាវជ្រាវ ។ ប៉ុន្តែបើផ្អែកលើឯកសារខ្លះទៀតថា របាំត្រុដិមានប្រវត្តិចេញពីជនជាតិដើមភាគតិចសំរ៉ែ តាំងពីយូរយារណាស់មកហើយ។ វាជាមរតកបន្តពីជំពូកជនជាតិដើមភាគតិចមួយនេះ និងជាចំណែកមួយ នៃអារ្យធម៌អំបូរអូស្ត្រូអាស៊ីយាង ដែលបានចាប់កំណើតនៅដែនដីប្រទេសកម្ពុជា តាំងពីបុរាណកាលរាប់ពាន់ឆ្នាំមុន។ ប្រពៃណីវប្បធម៌ដ៏យូរលង់ ក៏នៅបន្តរហូតដល់សង្គមសម័យនាបច្ចុប្បន្ន របាំត្រុដិ តែងទទួលការពេញនិយមសម្ដែងក្នុងកម្មវិធីនានា មុនបុណ្យចូលឆ្នាំថ្មីប្រពៃណីជាតិចូលមកដល់។ ដូច្នេះការលេងរបាំត្រុដិ គឺដើម្បីបណ្តេញឧបទ្រពចង្រៃក្នុងឆ្នាំចាស់ និងនាំមកនូវភាពសម្បូរសប្បាយប្រកបដោយសុភមង្គលសម្រាប់ឆ្នាំថ្មី។

ជាទូទៅការសម្តែងរបាំត្រុដិនេះច្រើនធ្វើឡើងនៅថ្ងៃឆ្លងឆ្នាំ ប៉ុន្តែក៏មានមុនពេលចូលឆ្នាំ និងអំឡុងពេលចូលឆ្នាំដែរ។ ពេលដែលសម្តែងចប់ម្តងៗ ក្រុមរបាំត្រូវច្រៀងជម្រាបលាម្ចាស់ផ្ទះ ហើយម្ចាស់ផ្ទះ ក៏បានយកទឹកមកប្រោះព្រំជូនពរដល់ក្រុមរបាំទាំងអស់នោះវិញដែរ។ ពុំនោះទេ គេមានជំនឿថាក្នុងឆ្នាំខាងមុខអ្នកនោះ នឹងមិនទទួលបានសិរីសួស្តីឡើយ៕