ក្នុងឱកាសចូលឆ្នាំថ្មី៣ថ្ងៃ នៅខេត្តបន្ទាយមានជ័យ គ្មានអំពើហិង្សា សន្តិសុខសណ្ដាប់ធ្នាប់ល្អ ក្មេងលេងប៉ាតម្សៅបាញ់ទឹកដោយភាពបរិសុទ្ធ

បន្ទាយមានជ័យ ៖ ក្នុងឱកាសបុណ្យចូលឆ្នាំថ្មី៣ថ្ងៃ នៅខេត្តបន្ទាយមានជ័យ ជោគជ័យយ៉ាងខ្លាំងដោយគ្មានអំពើហិង្សា សន្តិសុខសណ្តាប់ធ្នាប់ល្អ ក្មេងលេងប៉ាតម្សៅបាញ់ទឹក ទៅវិញទៅមកដោយភាពស្មោះត្រង់ និងបរិសុទ្ធ។

លោកវរសេនីយ៍ត្រី យ៉ាន់សុវណ្ណមេបញ្ជាការមូលដ្ឋានកងរាជអាវុធហត្ថក្រុងសិរីសោភ័ណបានប្រាប់អ្នកយកព័ត៌មានឲ្យដឹងថា ដោយអនុវត្តតាមបទបញ្ជារបស់គណៈបញ្ជាការឯកភាពខេត្ត និងតាមបទបញ្ជារបស់លោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យ និងលោកឧត្ដមសេនីយ៍ទោ អាត់ខែម ស្នងការនគរបាលខេត្តបន្ទាយមានជ័យ បានដាក់ចេញនូវបទបញ្ជាដល់កម្លាំងអាវុធហត្ថ និងនគរបាលទាំងអស់ ដែលចំណុះឲ្យបញ្ជាការដ្ឋានកងរាជអាវុធហត្ថខេត្ត និងស្នងការខេត្តត្រូវពង្រឹងក្នុងឱកាសបុណ្យចូលឆ្នាំខ្មែរ៣ថ្ងៃនៅខេត្តបន្ទាយមានជ័យប្រពៃណីជាតិឲ្យបានម៉ឺងម៉ាត់។ ត្រូវចាត់តាំងកម្លាំងចេញល្បាត និងការពារតាមគោលដៅសំខាន់ៗ និងទីប្រជុំជន ចាត់តាំងជំនាញចុះស្រាវជ្រាវរុករកមុខសញ្ញាជនល្មើស ត្រូវអនុវត្ត បង្ការ បង្ក្រាបបទល្មើសចុះត្រួតពិនិត្យចរាចរណ៍អាវុធជាតិផ្ទុះ បង្ក្រាបការប្រើប្រាស់អាវុធខុសច្បាប់ នៅក្នុងភូមិសាស្ត្រខេត្តបន្ទាយមានជ័យ ក៏ដូចជាតាមមូលដ្ឋានក្រុង ស្រុក និងការពារសន្តិសុខផងដែរ និងត្រូវពង្រឹងកិច្ចសហការជាមួយអាជ្ញាធរមូលដ្ឋាន ស្ថាប័នមានសមត្ថកិច្ចជំនាញ និងកងកម្លាំងប្រដាប់អាវុធ ក្នុងកិច្ចប្រតិបត្តិការល្អប្រសើរ។ តាមបណ្ដាអង្គភាពនីមួយៗ ចំណុះបញ្ជាការដ្ឋានកងរាជអាវុធហត្ថខេត្ត និងស្នងការខេត្ត ត្រូវពង្រឹងការងារឲ្យបានម៉ឺងម៉ាត់។

លោកវរសេនីយ៍ត្រី យ៉ាន់សុវណ្ណបានបញ្ជាក់ឲ្យដឹងទៀតថា បុណ្យចូលឆ្នាំខ្មែរ៣ថ្ងៃនេះជាមហាប្រសើរ ក្នុងក្រុមគ្រួសារខ្មែរ និងសង្គមជាតិទាំងមូល ក្នុងការទទួលទេវតាឆ្នាំថ្មី ឆ្លៀតក្នុងឱកាស នក្ខត្តឫក្សនេះផងដែរ លោកអភិបាលខេត្ត សួន បវរ ក៏ធ្វើការអំពាវនាវដល់បងប្អូនជនរួមជាតិខ្មែរទាំងអស់ ពិសេសក្រុមយុវជន យុវនារីក្នុងឱកាសបុណ្យចូលឆ្នាំថ្មីនេះ កុំប្រើប្រាស់គ្រឿងញៀន ទាំងការផលិតចរាចរណ៍ រក្សាទុកជួញដូរ ចែកចាយ ព្រោះវាជាអំពើខុសច្បាប់ កុំលេងល្បែងស៊ីសង គោរពច្បាប់ចរាចរណ៍ កុំលេង គប់ទឹក តាមដងផ្លូវសាធារណៈ និងចូរប្រុងប្រយ័ត្ន ភ្លើងអគ្គិសនី ធូប ទៀន ភ្លើងចង្ក្រាន ការពារទុស្សេ ខ្សែភ្លើង ដែលបង្កឲ្យឆេះរាលដាល បង្កឲ្យខូចខាតទ្រព្យសម្បត្តិជាដើម។ ធ្វើឲ្យទីតាំងរៀបចំសង្ក្រាន្តធំៗ៣កន្លែង១នៅសួនមានជ័យ ក្រុងសិរីសោភ័ណ២នៅភូមិផ្សារកណ្តាលក្រុងប៉ោយប៉ែតនិងទី៣នៅប្រាសាទបន្ទាយឆ្មារស្រុកថ្មពួក ៣ថ្ងៃនេះជោគជ័យយ៉ាងខ្លាំងគ្មានអំពើហិង្សា សន្តិសុខនិងសណ្តាប់ធ្នាប់ល្អ ក្មេងលេងប៉ាតម្សៅបាញ់ទឹកទៅវិញទៅមកដោយចិត្តស្មោះត្រង់និងភាពបរិសុទ្ធទាំងអស់គ្នា៕