លោកប្រធានាធិបតី Recep Tayyip Erdogan កាលពីថ្ងៃសុក្រ បានចោទប្រកាន់សហរដ្ឋអាមេរិកនិងអឺរ៉ុបថា បានជ្រៀតជ្រែកក្នុងកិច្ចការរបស់ប្រទេសទួរគី បន្ទាប់ពីមានសេចក្តីថ្លែងការណ៍ពីសម្ព័ន្ធមិត្តលោកខាងលិច ក្រោយការជំទាស់របស់គណបក្សកាន់អំណាចរបស់លោកចំពោះលទ្ធផលនៃការបោះឆ្នោតមូលដ្ឋាន។
លោក Erdogan និងគណបក្ស AKP របស់លោកបានទទួលរងនូវការខកចិត្តក្នុងការបោះឆ្នោតកាលពីថ្ងៃអាទិត្យមុននៅពេលដែលលទ្ធផលបានបង្ហាញថា គណបក្សនេះបានចាញ់ក្នុងរដ្ឋធានីអង់ការ៉ាហើយចាញ់ទាំងប្រផិតប្រផើយក្នុងទីក្រុងអ៊ីស្តង់ប៊ុលដែលជាទីក្រុងធំបំផុតរបស់ប្រទេសនេះនិងជាមជ្ឈមណ្ឌលសេដ្ឋកិច្ច។
ខណៈដែលសហរដ្ឋអាមេរិកអំពាវនាវឲ្យប្រទេសទួរគីទទួលយកលទ្ធផលនោះ សហភាពអឺរ៉ុបបានជំរុញឲ្យទីក្រុងអង់ការ៉ាអនុញ្ញាតឲ្យមន្ត្រីជាប់ឆ្នោតអនុវត្តអាណត្តិរបស់ខ្លួនដោយសេរី។
ប៉ុន្តែលោក Erdogan បានច្រានចោលការកត់សម្គាល់នេះហើយបានប្រាប់សហរដ្ឋអាមេរិកនិងអឺរ៉ុបឲ្យដឹងពីទីកន្លែងរបស់ពួកគេ។
លោក Erdogan បាននិយាយនៅក្នុងសុន្ទរកថាផ្ទាល់របស់លោកជាលើកដំបូងទៅកាន់អ្នកសារព័ត៌មានចាប់តាំងពីថ្ងៃចន្ទមកថា “អាមេរិកនិងអឺរ៉ុបកំពុងតែជ្រៀតជ្រែកក្នុងកិច្ចការផ្ទៃក្នុងរបស់ទួរគី”។ លោកបន្ថែមថា “ទួរគីបានផ្តល់មេរៀនប្រជាធិបតេយ្យដល់ពិភពលោកទាំងមូល”។
អំឡុងសន្និសីទមួយកាលពីថ្ងៃអង្គារ អ្នកនាំពាក្យក្រសួងការបរទេសអាមេរិកលោក Robert Palladino បាននិយាយថា ការបោះឆ្នោតដោយសេរីនិងយុត្តិធម៌គឺមានសារៈសំខាន់ចំពោះលទ្ធិប្រជាធិបតេយ្យហើយនេះមានន័យថា ការទទួលយកលទ្ធផលនៃការបោះឆ្នោតស្របច្បាប់គឺមានសារៈសំខាន់ខ្លាំងណាស់។
ចំណែកអ្នកនាំពាក្យសហភាពអឺរ៉ុបលោកស្រី Maja Kocijancic កាលពីថ្ងៃចន្ទបាននិយាយថា ក្រុងប្រ៊ូសសែលរំពឹងថា អ្នកតំណាងក្នុងមូលដ្ឋានដែលជាប់ឆ្នោតនឹងអាចអនុវត្តអាណត្តិរបស់ខ្លួនដោយសេរីនិងស្របតាមគោលការណ៍របស់ក្រុមប្រឹក្សាអឺរ៉ុប។
បេក្ខជនជាគូប្រជែងពីររូបសម្រាប់តំណែងទីក្រុងអ៊ីស្តង់ប៊ុលសុទ្ធតែបានប្រកាសជ័យជម្នះភ្លាមៗបន្ទាប់ពីការបោះឆ្នោតនៅពេលដែលលទ្ធផលបឋមបានបង្ហាញថា ពួកគេកំពុងប្រកៀកប្រកិតគ្នា។ គណបក្ស AKP បានដាក់ពាក្យបណ្តឹងបន្ទាប់ពីអាជ្ញាធរបោះឆ្នោតនិយាយនាពេលក្រោយថា លោក Ekrem Imamoglu នៃគណបក្សប្រឆាំងបាននាំមុខបន្តិចបន្តួច៕ AFP
Source: Kampuchea Thmey Daily
0 Comments