យោងតាមការបញ្ជាក់របស់គណៈកម្មការប្រកួតបាល់ទាត់ជាតិកម្ពុជា (CNCC) លើកឡើងថាលោក Conor Nestor គ្រូបង្គោលក្លិបព្រះខ័នរាជស្វាយរៀង ទទួលងារជាគ្រូបង្វឹកដែលដឹកនាំក្រុមឆ្នើមជាងគេប្រចាំខែមីនា ឆ្នាំ២០១៩ កន្លងទៅក្រោយដឹកនាំកូនក្រុមបានល្អក្នុងក្របខណ្ឌលីគកំពូលកម្ពុជា (Metfone Cambodian League) ៣ប្រកួតបើកឆាកកន្លងមក។
គ្រូបង្វឹកជនជាតិអៀរឡង់ រូបនេះបានលើកឡើងក្រោយទទួលបានងារលើកដំបូងនេះថា នេះមិនមែនជាសមិទ្ធផលខ្លួនតែម្នាក់ឯងឡើយ តែក៏ជាស្នាដៃរបស់ក្រុមការងារ និងកីឡាករទាំងអស់ដែរ។ លោកបន្តថា គ្រូបង្វឹកតែម្នាក់ឯងមិនអាចរ៉ាប់រងការងារទាំងអស់ទេ ដូច្នេះ ការឈ្នះពាននេះគឺបានមកពីចំណែកសមាជិកគ្រប់ៗគ្នារបស់ព្រះខ័នរាជស្វាយរៀង។ លោក Conor Nestor ត្រូវបាន CNCC ស្រង់សម្តីថា «ខ្ញុំពិតជារីករាយមែនទែនចំពោះការផ្ដល់នូវកិត្តិយសនេះ តែយ៉ាងណាក៏ដោយ ខ្ញុំយល់ថា មិនមែនតែគ្រូបង្វឹកម្នាក់ឯងទេដែលជួយឲ្យឈ្នះការប្រកួត តែកីឡាករទេដែលជាអ្នកបញ្ចេញស្នាដៃ។ ដូច្នេះសមិទ្ធផលនេះគឺជារបស់ពួកគេ មិនមែនសម្រាប់ខ្ញុំទេ»។
ស្ថាប័ន CNCC បញ្ជាក់ថា លោក Conor ត្រូវបានជ្រើសរើសជាគ្រូបង្វឹកល្អប្រចាំខែមីនា រដូវកាល២០១៩ នេះគឺក្រោយលោកដឹកនាំព្រះខ័នរាជស្វាយរៀងឈ្នះពីរប្រកួតដំបូងនៃ Metfone Cambodina League លើអគ្គស្នងការដ្ឋាននគរបាលជាតិ ២ទល់០ និងសូលទីឡូអង្គរ ១ទល់០ ហើយថែមទាំងមិនរបូតគ្រាប់បាល់ទៀត។ ចំណែកកាលថ្ងៃអាទិត្យ ទី០៧ មេសា ព្រះខ័នរាជស្វាយរៀង បានបន្តឈ្នះម្ចាស់ផ្ទះគិរីវង់សុខសែនជ័យ២ទល់នឹង០ ទៀត។ គិតត្រឹមពេលនេះព្រះខ័នរាជស្វាយរៀង កំពុងឈរកំពូលតារាងបណ្តោះអាសន្នមាន៩ពិន្ទុច្រើនជាងគេ។
នេះក៏ជាលើកទី១ដែលគណៈកម្មាធិការប្រកួតបាល់ទាត់ជាតិកម្ពុជា (CNCC) បង្កើតពានរង្វាន់នេះឡើងដែលគ្រូបង្វឹកឆ្នើមជាងគេបានទៅលើលោក Conor Nestor គ្រូបង្វឹករបស់ក្រុមព្រះខ័នរាជស្វាយរៀង ខណៈពានកីឡាករឆ្នើមជាងគេបានទៅកីឡាករ គួច សុកុម្ភៈ ប្រធានក្រុមក្លិបជើងឯកឆ្នាំចាស់ ណាហ្គាវើល៕
Source: Kampuchea Thmey Daily
0 Comments