តាកែវ ៖ ជនសង្ស័យ២នាក់ ត្រូវបានកម្លាំងនគរបាលក្រសួងមហាផ្ទៃ សហការជាមួយកម្លាំងនគរបាលនៃស្នងការខេត្តតាកែវបង្ក្រាបបានជាមួយនឹងការផ្ទុះអាវុធមួយប្រ៉ាវ ព្រោះតែជនសង្ស័យមានអាវុធបាញ់តដៃជាមួយសមត្ថកិច្ច។
នៅទីបំផុតសមត្ថកិច្ចបង្ក្រាបបានហើយ ករណីជនសង្ស័យគ្រឿងញៀនផ្ទុះអាវុធបាញ់តដៃជាមួយកម្លាំងនគរបាលនៅស្រុកបាទីនៅរសៀលថ្ងៃទី០៤ ខែឧសភា ឆ្នាំ២០១៩ ដោយកម្លាំងនគរបាលក្រសួងមហាផ្ទៃ សហការជាមួយកម្លាំងនគរបាលនៃស្នងការខេត្តតាកែវដែលដឹកនាំបញ្ជាផ្ទាល់ដោយលោកឧត្តមសេនីយ៍ទោ សុខ សំណាង ស្នងការនគរបាលខេត្ត។ ហេតុការណ៍បង្ក្រាបករណីជួញដូរគ្រឿងញៀនទ្រង់ទ្រាយធំនេះ ធ្វើឡើងនៅភូមិក្រាំងក្រចាង ឃុំពារាម ស្រុកបាទី ខេត្តតាកែវ។ មុខនឹងឈានដល់ការចាប់ខ្លួនជនសង្ស័យ កម្លាំងជំនាញបានប្រើប្រាស់គ្រប់មធ្យោបាយ និងមានការផ្ទុះអាវុធផងដែរ ទើបឃាត់ខ្លួនជនសង្ស័យបាន២នាក់ និងដកហូតវត្ថុតាងមាន កាំភ្លើងខ្លី០១ដើម ដាវសាំម៉ូរៃ០២ដើម ទូរស័ព្ទដៃ០៤គ្រឿង ស្នាប់ដៃ០១ និងដកហូតបានថ្នាំញៀនមួយចំនួន។
បច្ចុប្បន្នក្រោយការបង្ក្រាបករណីគ្រឿងញៀននេះ កម្លាំងជំនាញបាននាំខ្លួនជនសង្ស័យមកកាន់ស្នងការនគរបាលខេត្តតាកែវ ដើម្បីសួរនាំបន្តនិងកសាងសំណុំរឿងបញ្ជូនទៅកាន់សាលាដំបូងខេត្តចាត់ការតាមនីតិវិធី៕
Source: Kampuchea Thmey Daily
0 Comments