សៀមរាប ៖ នៅថ្ងៃទី០៣ ខែឧសភា ឆ្នាំ២០១៩ កន្លងទៅនេះ សភាពាណិជ្ជកម្មអឺរ៉ុបនៅកម្ពុជា ដឹកនាំដោយ លោក ហ្គីយ៉ូម ម៉ាឡតាវ៉ែន (Guillaume MALTAVARNE) មន្ត្រីផ្នែកទាក់ទាញវិនិយោគ បាន ជួបសំណេះសំណាលការងារជាមួយ ថ្នាក់ដឹកនាំនៃ អាជ្ញាធរជាតិអប្សរា ដើម្បីស្វែងយល់កិច្ចការគ្រប់គ្រងសំណល់រឹង និងគ្រប់គ្រងទឹកកខ្វក់ក្នុងរមណីយដ្ឋានអង្គរ។
កិច្ចប្រជុំនេះ សភាពាណិជ្ជកម្មអឺរ៉ុបបានលើកឡើងនូវការងារសំខាន់ៗជាច្រើន ហើយការងារដែលជាអាទិភាពគឺ ការលើកកម្ពស់ពាណិជ្ជកម្ម ការសិក្សាអំពីសេដ្ឋកិច្ច និងផ្តោតសំខាន់លើការគ្រប់គ្រងសំណល់រឹង និងការគ្រប់គ្រងទឹកកខ្វក់។
ក្នុងនោះ អាជ្ញាធរជាតិអប្សរា ក៏បានបង្ហាញនូវកិច្ចការរបស់ខ្លួនពាក់ព័ន្ធនឹងការគ្រប់គ្រងសំណល់រឹង (សំរាម) ទឹកកខ្វក់នៅក្នុងតំបន់អង្គរផងដែរ។ កត្តាពីរដែលបណ្តាលឲ្យមានសំរាម គឺកត្តាភ្ញៀវទេសចរ និងប្រជាជនក្នុងមូលដ្ឋាន ក៏ព្រោះប្រជាជននៅពុំទាន់យល់ដឹងទូលំទូលាយចំពោះការរក្សាសំរាម ការរក្សាអនាម័យឲ្យបានត្រឹមត្រូវជាដើម។
ចំពោះបញ្ហានេះ អាជ្ញាធរជាតិអប្សរាក៏មានសកម្មភាពមួយចំនួនដូចជា ការអប់រំឲ្យស្គាល់តម្លៃបេតិកភណ្ឌ ការគ្រប់គ្រងអនាម័យជុំវិញលំនៅដ្ឋាន និងផលប៉ះពាល់ នៃការដុតសំរាម ការចោលថង់ប្លាស្ទិកពាសវាលពាសកាល។ លើសពីនេះ អាជ្ញាធរជាតិអប្សរាក៏មានសកម្មភាពប្រមូលសំរាម ប្រមូលស្លឹកឈើងាប់ សំណល់ផ្ទះបាយ ដើម្បីផលិតជីកំប៉ុសផងដែរ ក្រៅពីការងារដែលអាជ្ញាធរជាតិអប្សរាបានផ្តល់ឲ្យក្រុមហ៊ុនវីហ្គ្រីនសម្អាតជាប្រចាំ។
ក្រោយពីពិភាក្សាស្វែងយល់ពីគ្នាទៅវិញទៅមក សភាពាណិជ្ជកម្មអឺរ៉ុបនៅកម្ពុជា ក៏បានបង្ហាញបំណងចង់ស្វែងយល់លទ្ធភាពដើម្បីធ្វើកិច្ចសហប្រតិបត្តិការជាលក្ខណៈស្ថាប័ន និងស្ថាប័ន ឬវិស័យឯកជនណាមួយ ដើម្បីធ្វើការងាររួមគ្នាលើវិស័យគ្រប់គ្រងសំណល់រឹង និង គ្រប់គ្រងទឹកកខ្វក់នៅរមណីយដ្ឋានអង្គរ៕
Source: Kampuchea Thmey Daily
0 Comments