ភ្នំពេញ ៖ ក្នុងរយៈពេល៣ថ្ងៃជាប់គ្នានេះ កម្លាំងនគរបាលប៉ុស្តិ៍ស្រះចក និងកម្លាំងជំនាញ នៃអធិការនគរបាលខណ្ឌដូនពេញពេញ បានបន្តសហការគ្នាចាប់បង្ក្រាបករណីជួញដូរគ្រឿងបន្តបន្ទាប់ ដោយឃាត់ខ្លួនជនសង្ស័យចំនួន៣នាក់ ព្រមទាំងដកហូតវត្ថុតាងថ្នាំញៀនរាប់រយកញ្ចប់ផងដែរ។
សមត្ថកិច្ចផ្នែកជំនាញគ្រឿងញៀន នៃអធិការនគរបាលខណ្ឌដូនពេញបានឲ្យដឹងថា ជាក់ស្តែងករណីបង្ក្រាបលើកទី១-កិច្ចប្រតិបត្តិការក្នុងយុទ្ធនាការបន្តស្រាវជ្រាវបង្ក្រាបករណីជួញដូរដោយខុសច្បាប់នូវសារធាតុញៀននោះ ធ្វើឡើងនៅថ្ងៃទី០២ ខែឧសភា ឆ្នាំ២០១៩ វេលាម៉ោង១២និង១០នាទី ដោយអនុវត្តន៍តាមគោលការណ៍ដឹកនាំរបស់ លោក សុខ ពេញវុធ អភិបាល នៃគណៈអភិបាលខណ្ឌដូនពេញ អធិការដ្ឋាន ប៉ុស្តិ៍ បានបើកការស្រាវជ្រាវបង្ក្រាបករណីជួញដូរនូវសារធាតុញៀន ស្ថិតនៅចំណុចផ្លូវរថភ្លើង R6 ក្តាន់ពីរក្រុម៣៩ ភូមិ៣ សង្កាត់ស្រះចក ខណ្ឌដូនពេញ។
ជាលទ្ធផល នៃកិច្ចប្រតិបត្តិការនេះ កម្លាំងសមត្ថកិច្ចយើងបានធ្វើការឃាត់ខ្លួនជនសង្ស័យចំនួនម្នាក់ឈ្មោះ លឹម រតនា ហៅអាពេជ្រ ភេទប្រុស អាយុ២០ឆ្នាំ ជនជាតិខ្មែរ មុខរបរមិនពិតប្រាកដ ស្នាក់នៅបន្ទប់ជួលទីតាំងខាងលើ (ជួញដូរគ្រឿងញៀន)។
សមត្ថកិច្ចបានបន្តទៀតថា មុនពេលឈានដល់ការឃាត់ខ្លួនជនសង្ស័យរូបនោះ គឺកម្លាំងជំនាញខណ្ឌ រួមជាមួយកម្លាំងនគរបាលប៉ុស្តិ៍ស្រះចក បានកំណត់ពីមុខសញ្ញាជួញដូរគ្រឿងញៀនរូបនោះច្បាស់ហើយនោះ ទើបនៅថ្ងៃនោះដែរ កម្លាំងក៏ចុះបង្ក្រាបជាក់ស្តែង ដោយឃាត់ខ្លួនជនសង្ស័យរូបនោះ ព្រមទាំងវត្ថុតាងចាប់យករួមមាន ១/ក្រាមពណ៌សថ្លា សង្ស័យជាគ្រឿងញៀនចំនួន១២៤កញ្ចប់ ក្នុងនោះមាន០២កញ្ចប់ធំ។ ២/ជញ្ជីងថ្លឹងគ្រឿងញៀនចំនួន០២។ ៣/ដាវកែច្នៃចំនួន០៤ដើម។ ៤/ថង់សម្រាប់ច្រកគ្រឿងញៀនមួយចំនួន។ ៥/ឧបករណ៍ប្រើប្រាស់គ្រឿងញៀនមួយចំនួន។
សមត្ថកិច្ចបញ្ជាក់ទៀតថា ករណីបង្ក្រាបលើកទី២ កម្លាំងជំនាញខណ្ឌប៉ុស្តិ៍ បានបើកការស្រាវជ្រាវជាប់ជាប្រចាំចំពោះមុខសញ្ញាប្រព្រឹត្តបទល្មើសគ្រប់ប្រភេទ ជាក់ស្ដែងនៅថ្ងៃទី០២ ខែឧសភា ឆ្នាំ២០១៩ វេលាម៉ោង១៨និង៣០នាទី ក្រោយពីកំណត់បានមុខសញ្ញា និងទីតាំងប្រព្រឹត្តសកម្មភាពរួចមក សមត្ថកិច្ចយើងបានបើកកិច្ចប្រតិបត្តិការបង្ក្រាបចំពោះមុខសញ្ញាជួញដូរគ្រឿងញៀនយ៉ាងសកម្មប្រចាំតំបន់ដែលកំពុងធ្វើសកម្មភាពចរាចរណ៍គ្រឿងញៀន ស្ថិតនៅចំណុចលើផ្លូវរថភ្លើង ក្រុម៣៩ ភូមិ៣ សង្កាត់ស្រះចក ដោយបានធ្វើការឃាត់ខ្លួនជនសង្ស័យចំនួន០១នាក់ ឈ្មោះ ជិន សារ៉ាវី ភេទប្រុស អាយុ២២ឆ្នាំ ជនជាតិខ្មែរ មុខរបរមិនពិតប្រាកដ ស្នាក់នៅផ្ទះជួលម្តុំផ្សារទំនប់ សង្កាត់ទួលសង្កែទី២ ខណ្ឌឫស្សីកែវ រាជធានីភ្នំពេញ។
សមត្ថកិច្ចបន្តទៀតថា ក្នុងការឃាត់ខ្លួនជនសង្ស័យរូបនោះបានរកឃើញវត្ថុតាងដកហូតរួមមានក្រាមពណ៌សថ្លា សង្ស័យជាគ្រឿងញៀនចំនួន០៤កញ្ចប់ធំ(បួនកញ្ចប់ធំ) ដែលលាក់ទុកនៅក្នុងកូនកាបូបស្ពាយ ពណ៌ខ្មៅលាយទឹកប៊ិច មួយបំពង់ជ័រ ពណ៌លឿងមួយ សម្រាប់ចូកគ្រឿងញៀនកូនថង់ប្លាស្ទិកមួយចំនួន។
សមត្ថកិច្ចបានបញ្ជាក់ទៀតថា ករណីបង្ក្រាបលើកទី៣ កម្លាំងជំនាញខណ្ឌប៉ុស្តិ៍ បានបើកការស្រាវជ្រាវជាប់ជាប្រចាំចំពោះមុខសញ្ញាប្រព្រឹត្តបទល្មើសគ្រប់ប្រភេទ ជាក់ស្ដែងនៅថ្ងៃទី០៣ ខែឧសភា ឆ្នាំ២០១៩ វេលាម៉ោង១៩និង០០នាទី ក្រោយពីកំណត់បានមុខសញ្ញា និងទីតាំងប្រព្រឹត្តសកម្មភាពរួចមក សមត្ថកិច្ចយើងបានបើកកិច្ចប្រតិបត្តិការបង្ក្រាបចំពោះមុខសញ្ញាជួញដូរគ្រឿងញៀនយ៉ាងសកម្មប្រចាំតំបន់ ដែលកំពុងធ្វើសកម្មភាពចរាចរណ៍គ្រឿងញៀន ស្ថិតនៅចំណុចលើផ្លូវរថភ្លើង ក្រុម៣៩ ភូមិ៣ សង្កាត់ស្រះចក ដោយបានធ្វើការឃាត់ខ្លួនជនសង្ស័យចំនួន០១នាក់ ឈ្មោះ ពេជ្រ ឆៃ ហៅស៊ី ភេទប្រុស អាយុ៣៤ឆ្នាំ ជនជាតិខ្មែរ មុខរបរ និងទីលំនៅមិនពិតប្រាកដ។ ព្រមទាំងដកហូតវត្ថុតាង១/ក្រាមពណ៌សថ្លា សង្ស័យជាគ្រឿងញៀនចំនួន០១កញ្ចប់ធំ(មួយកញ្ចប់ធំ)។
២/កូនថង់ប្លាស្ទិកមួយចំនួន។
៣/លុយចំនួន១០$(ដប់ដុល្លារអាមេរិក)។
សមត្ថកិច្ចបញ្ជាក់ថា ចំពោះមុខកម្លាំងជំនាញខណ្ឌប៉ុស្តិ៍កំពុងបន្តការស្រាវជ្រាវរកបក្ខពួក និងកសាងសំណុំរឿងដើម្បីបញ្ជូនទៅសាលាដំបូងរាជធានីភ្នំពេញអនុវត្តតាមនីតិវិធី៕
Source: Kampuchea Thmey Daily
0 Comments