បាត់ដំបង ៖ បុរសម្នាក់ ដែលមានមុខរបរជាជាងផ្សាដែក កំពុងត្រូវបានក្រុមគ្រូពេទ្យធ្វើការសង្គ្រោះ បន្ទាប់ពីបុរសរូបនេះ បានឡើងទៅផ្សារគ្រោងដែកនៅលើដំបូល ហើយបានឆក់នឹងចរន្តអគ្គីសនីបណ្តាលឲ្យធ្លាក់មកដីតែម្តង។
ហេតុការណ៍នេះ បានកើតឡើងកាលពីវេលាម៉ោង១និង៥០នាទីរសៀល ថ្ងៃទី៧ ខែឧសភា ឆ្នាំ២០១៩ ត្រង់ចំណុចអាហារដ្ឋាន នាងចំប៉ាថោង ស្ថិតក្នុង ភូមិមោង ឃុំមោង ស្រុកមោងឫស្សី ខេត្តបាត់ដំបង។
បើតាមប្រភពនៅក្បែរទីតាំងខាងលើ បាននិយាយថា នៅមុនពេលកើតហេតុ គឺមានក្រុមជាង ១ ក្រុម បានឡើងទៅលើដំបូលអាហារដ្ឋានខាងលើ ដើម្បីផ្សារគ្រោងដែកប្រក់ជាដំបូល។
ប្រភពដដែលបានបន្តថា នៅពេលនោះដែរ ក៏មានជាងម្នាក់ឈ្មោះ ណាត ណាន ភេទប្រុស អាយុ៣៩ឆ្នាំ មុខរបរជាជាងផ្សារដែក រស់នៅភូមិស្វាយធំ ឃុំអន្លង់វិល ស្រុកសង្កែ ខេត្តបាត់ដំបង បានឡើងទៅខាងលើ ហើយទាញដែកចុះឡើង ដែលគេសង្ស័យថា អាចចុងដែកប៉ះទង្គិចទៅនឹងខ្សែភ្លើង ទើបធ្វើឲ្យឆក់ធ្លាក់មកដីបង្កឲ្យប៉ះទង្គិចត្រង់ក្បាលរបួសយ៉ាងធ្ងន់ធ្ងរ។
ភ្លាមៗនោះដែរ ជនរងគ្រោះត្រូវបានម្ចាស់ទីតាំងបញ្ជូនទៅសង្គ្រោះនៅមន្ទីរពេទ្យបង្អែកស្រុកមោងឫស្សី នេះគឺជាបញ្ហាសម្រាប់អ្នកដែលសាងសង់លំនៅឋានក្បែរគន្លងចរន្តអគ្គិសនីឆ្លងកាត់៕
Source: Kampuchea Thmey Daily
0 Comments