ភ្នំពេញ ៖ សាលាដំបូងរាជធានីភ្នំពេញ បានកោះហៅតុលាការកោះហៅលោក សុខ ទូច ប្រធានរាជបណ្ឌិតសភាកម្ពុជា ឲ្យចូលបំភ្លឺនៅថ្ងៃទី១០ ខែឧសភា ឆ្នាំ២០១៩ វេលាម៉ោង៩ និង៣០នាទីព្រឹក ទាក់ទងបណ្តឹងរបស់ឈ្មោះ ខែម ស៊ីឡេង អគ្គលេខាធិការរងគណបក្សខ្មែរក្រោក ដែលបានប្តឹងពីបទ កុបកម្ម និងបទជ្រៀតជ្រែកដោយខុសច្បាប់ទៅក្នុងការបំពេញមុខងារសាធារណៈ នេះបើតាមដីកាចុះហត្ថលេខាដោយលោក វា សក្តា ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ កាលពីថ្ងៃទី០២ ខែឧសភា ឆ្នាំ២០១៩។
ទាក់ទងការកោះហៅនេះ លោកបណ្ឌិត សុខ ទូច ប្រធានរាជបណ្ឌិត្យសភាកម្ពុជា បានអះអាងថា លោកនឹងចូលខ្លួនឆ្លើយបំភ្លឺនៅតំណាងអយ្យការអមសាលាដំបូងរាជធានីភ្នំពេញ នៅថ្ងៃទី១០ ខែឧសភា ឆ្នាំ២០១៩ខាងមុខនេះ តាមបណ្តឹងរបស់គណបក្សខ្មែរក្រោក។
លោក សុខ ទូច បានបញ្ជាក់នៅលើបណ្តាញសង្គម Facebook យ៉ាងដូច្នេះថា “វាជារឿងចម្លែកក្នុងជីវិតរបស់ខ្ញុំ ព្រោះមិនធ្លាប់ត្រូវបានតុលាការកោះហៅទេ តែពេលនេះ ត្រូវបានព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញកោះហៅតាមរយៈដីកាកោះហៅចុះថ្ងៃទី០២ ខែឧសភា ឆ្នាំ២០១៩ ឲ្យចូលខ្លួននៅថ្ងៃទី១០ ខែឧសភា ឆ្នាំ២០១៩ វេលាម៉ោង៩ និង៣០ នាទីព្រឹក តាមបណ្តឹងរបស់គណបក្សខ្មែរក្រោកចុះថ្ងៃទី០៨ ខែសីហា ឆ្នាំ២០១៨។ ទោះបីខ្ញុំមមាញឹករកពេលសម្រាកមិនបាន ក្នុងការបំពេញការងាររាជការ ក៏ខ្ញុំនឹងចូលខ្លួនតាមការកោះហៅនេះ”។
សូមបញ្ជាក់ថា កាលពីឆ្នាំ២០១៨ គណបក្សខ្មែរក្រោក បានប្រកាសប្តឹងលោក សុខ ទូច ទាក់ទងការធ្វើអត្ថាធិប្បាយ ពីការប្រមូលស្នាមមេដៃតវ៉ាយកកោះត្រល់ ដែលបានបាត់បង់ទៅឲ្យវៀតណាម៕
Source: Kampuchea Thmey Daily
0 Comments