ភ្នំពេញ ៖ ក្នុងរយៈពេលចុងក្រោយនេះ បាតុភាពរញ៉េរញ៉ៃរវាងអតិថិជនអ្នកទិញដីឡូតិ៍បង់រំលស់ពីក្រុមហ៊ុនលក់ដីខ្យល់មួយចំនួនបាននឹងកំពុងកើតមានឡើងយ៉ាងក្ដៅគគុក ដោយក្រុមហ៊ុនខិលខូចអស់ទាំងនោះ យកតែលុយគេ ហើយ គ្មានដីឲ្យគេ ដើរទៅចង្អុលដីគេ ត្រង់នេះ ឬ ត្រង់នោះទីបំផុតរកដីឲ្យអតិថិជនមិនបាន១ចំអាមផង សូម្បី តែសុំទារយកលុយវិញក៏សុំមិនបានដែរ. សន្យាចោលរហូត ទីបំផុតសន្យា ឲ្យរុះរើយកទីស្នាក់ការនោះចុះ ដល់ ថ្ងៃកំណត់ម្ចាស់លុយទៅរុះរើមែនទែន បែរជា ម្ចាស់ក្រុមហ៊ុនលក់ដីឡូតិ៍ខ្យល់ សម្ដីមេឃទ្រាប់អង្គុយ ប្ដឹងប៉ូលិសឲ្យឃាត់ខ្លួនទៅវិញ អត់បានលុយវិញហើយ ចង់វ័ណ្ឌ.ក ប៊ិះជាប់គុកទៀត។
ប្រភពព័ត៌មានបានឲ្យដឹងថា ជម្លោះដ៏សែនចម្រូងចម្រាស រវាងភាគីអ្នកទិញដី ជាមួយភាគីខាងក្រុមហ៊ុនលក់ដីខ្យល់នោះ ផ្តើមចេញពីអត់មានដីឲ្យអតិថិជន ហើយគ្មានលុយសងគេវិញទៀត កើតជារឿងជម្លោះពាក្យ សម្តី ផ្អើលសមត្ថកិច្ច ចុះទៅសម្របសម្រួល កាលពីល្ងាចថ្ងៃទី០៦ ខែឧសភា ឆ្នាំ២០១៩ នៅទីស្នាក់ការលក់ដីឡូតិ៍ ក្នុងភូមិស្រែរាជ្ជៈ សង្កាត់សំរោងក្រោម ខណ្ឌពោធិ៍សែនជ័យ។
សមត្ថកិច្ចឲ្យដឹងថា ក្រុមហ៊ុនលក់ដីខាងលើយីហោ រៀល ប្រជេក ប៊ីហ្សនេស ឯ.ក ដែលមានអាសយដ្ឋាន ផ្ទះលេខ៣៦ មហាវិថីឈ្នះ ឈ្នះ ក្នុងភូមិស្រែរាជ្ជៈ សង្កាត់សំរោងក្រោម ខណ្ឌពោធិ៍សែនជ័យ។
បើយោងតាមសម្តីភាគីខាងអ្នកទិញឈ្មោះ សាន មឿន ភេទប្រុស អាយុ៤៥ឆ្នាំ បានឲ្យដឹងថា គាត់បានទិញដីបង់រំលស់ ពីក្រុមហ៊ុនខាងលើនេះដោយ បង់លុយជាដំណាក់កាលៗ ហើយគាត់បង់អស់២៥០០ដុល្លារ ក្នុងតម្លៃដី សរុប៩៨០០ដុល្លារ ហើយបង់ក្នុង១ខែ២០០ដុល្លារ ដោយបង់បាន៥ខែ តែអ្វីដែលមិននឹកស្មានដល់ ខំបង់លុយអស់២៥០០ដុល្លារហើយ បែរជាក្រុមហ៊ុន មិនមានដីប្រគល់ឲ្យទៅវិញ សួរលិច ធ្លាយកើត សួរកើតធ្លាយទៅជើង ទីបំផុត ទើបដឹងថា ក្រុមហ៊ុនលក់ដីខ្យល់ រកតែដីមួយចំអាមក៏ គ្មានផង ដើរតែចង្អុលដីគេ ម្តងដីនេះ ម្តងដីនោះ អស់ជម្រើស សល់អស់ជម្រើស ក៏បាន សន្យាប្រគល់ឲ្យលុយវិញ។
ប្រភពបន្ដថា ការសន្យាប្រគល់លុយវិញនោះទៀតសោត បើមិនបានគ្រប់ចំនួន តាមកិច្ចសន្យាទេនោះ គេនឹងប្រគល់ឲ្យភាគីខាងម្ចាស់បំណុល ដែលជាជាភាគីខាងអ្នកទិញដី ចង់រុះរើ យកតូប យកទីស្នាក់ការ ចង់យកអ្វីក៏យកទៅ។ ស្រាប់តែ ដល់ថ្ងៃកំណត់ ក្រុមហ៊ុន ត្រូវប្រគល់លុយឲ្យវិញ ស្រាប់តែគ្មានបានមួយរៀល បានតែសម្តីយកមេឃទ្រាប់អង្គុយ តែអត់លុយសងម្ចាស់បំណុល ទើបភាគីរងគ្រោះ រុះ រើ យកឥវ៉ាន់ នៅកន្លែង ទីស្នាក់ការដើម្បីកាត់កងលុយខ្លះ ព្រោះគេធ្លាប់សន្យាម្ដងជា ពីរដងថាឲ្យដីតែគ្មានដីឲ្យ បន្ទាប់មកសន្យាឲ្យលុយវិញតែក៏គ្មានលុយឲ្យដែរ ទើបចុងក្រោយ គេសន្យាឲ្យរុះរើយកសម្ភារៈខ្លះក្នុងទៅស្នាក់ការ ដល់មករុះរើបែរជាប្ដឹងប៉ូលិសទៅវិញ។
តាមភាគីខាងក្រុមហ៊ុនលក់ដីខ្យល់ ឈ្មោះ លី វ៉ាឌីណា មានទីលំនៅ ភូមិ សង្កាត់កើតហេតុ មិនមានការបំភ្លឺ ជុំវិញដី ដែលលក់ឲ្យអតិថិជនថា នៅត្រង់ណាឡើយ ក្រោយពីភាគីខាងអតិថិជនខ្លួន ប្រមូលឥវ៉ាន់ បែរជាឆ្ការដៃជើង ឡាំប៉ា ខឹងប្តឹងប៉ូលិសទៅវិញ ទើបភាគីអតិថិជន ចោទសួរ ថាឯ ណាទៅកិច្ចសន្យាពិត ដីនៅត្រង់ណា ឯណាទៅលុយ ត្រូវសង ឲ្យតែគ្រប់ចំនួនតាមការសន្យាវាចប់រឿងហើយ ?
ភាពចម្រូងចម្រាសគ្នារវាង អ្នកលក់និងអ្នកទិញ ការប្រមូលយកឥវាន់ត្រូវបានអាក់ខានទៅវិញ បន្ទាប់ពីអន្តរាគមន៍ពី សមត្ថកិច្ច អាជ្ញាធរ រង់ចាំរកដំណោះស្រាយដោយសន្តិវិធី តែភាគី ខាងរងគ្រោះ បានលើកឡើងដែរថា កុំសន្យាខ្យល់ តៀត បើបានលុយវិញគេមិនទៅធ្វើអីចឹងទេ ពេលយកលុយគេក៏ស្រួលម្ល៉េះ ដល់គេមកទទួល យកអ្វីដែលជារបស់គេវិញហេតុអីក៏បង្កការលំបាកទៅវិញ៕
Source: Kampuchea Thmey Daily
0 Comments