ពោធិ៍សាត់ ៖ ស្ត្រីម្នាក់ បានស្លាប់ភ្លាមៗនៅកន្លែងកើតហេតុ ដោយសារប្ដីកាប់ពីរពូថៅ ព្រោះតែរឿងប្រច័ណ្ឌថា ប្រពន្ធមានសហាយ។ អំពើឃាតកម្មនេះ បានកើតឡើង កាលពីថ្ងៃទី០៦ ខែឧសភា ឆ្នាំ២០១៩ វេលាម៉ោង២០និង២០នាទីនៅចំណុចផ្ទះជនរងគ្រោះ ស្ថិតនៅភូមិត្រពាំងឃ្លៃ ឃុំបឹងកន្ទួត ស្រុកក្រគរ ខេត្តពោធិ៍សាត់។
ជនរងគ្រោះ ដែលប្ដីកាប់ស្លាប់ ឈ្មោះ យឿន សាវិន អាយុ៣៣ឆ្នាំ ជាកម្មការិនីរោងចក្រកាត់ដេរ ។ ចំណែកជនដៃដល់ ឈ្មោះ ម៉ុន សាម៉ន អាយុ៣២ឆ្នាំ ជាកសិករ រស់នៅភូមិ/ឃុំកើតហេតុ។
ជនរងគ្រោះ ត្រូវជនសង្ស័យកាប់ពីរពូថៅចំ.ក បណ្តាលឲ្យស្លាប់នៅកន្លែងកើតហេតុ។
ពាក់ព័ន្ធករណីឃាតកម្មនេះ កូនប្រុសរបស់ជនរងគ្រោះបានរៀបរាប់ថា មុនពេលកើតហេតុ ម៉ែមកពីធ្វើការនៅរោងចក្រកាត់ដេរ(តៃអីហ្សី)បានទិញលៀសហាលយកមកហូបបាយ។ ពេលម៉ែងូតទឹករួច ក៏នាំគ្នាដួសបាយហូបជុំគ្នា ប្តី ប្រពន្ធ កូន ពេលកំពុងហូបបាយ ឪ បានប្រើកូនយកបោយដងទឹកឲ្យហូបពេលកូនដងទឹកឲ្យហូបរួច ហើយ ឱបានចោលបោយទៅកៀនជញ្ជាំង កូនក៏រើសយកមកវិញ ពេលនោះម៉ែបានឆក់យកបោយពីកូនគប់ទៅលើឱ ស្រាប់តែឱទាញកែវគប់ទៅលើម៉ែវិញ។ បន្ទាប់មកនោះ ឪ ក៏ទាញពូថៅកាប់ទៅលើម៉ែចំ.ក ពីរពូថៅខាងស្តាំ បណ្តាលឲ្យម៉ែដួលស្លាប់ភ្លាមៗនៅកន្លែងកើតហេតុ។
ក្រោយធ្វើសកម្មភាពរួច ឪ បានទៅប្រាប់អ្នកជិតខាងថា អញកាប់ប្រពន្ធអញស្លាប់ហើយ ពេលនោះប្រជាពលរដ្ឋនៅជិតខាង និងបងប្អូនជនរងគ្រោះបានព័ទ្ធចាប់ឪ ចង ហើយហៅសមត្ថកិច្ចជួយអន្តរាគមន៍។
នៅអធិការដ្ឋាននគរបាលស្រុកក្រគរ ជនដៃដល់បានសារភាពថា មូលហេតុដែលខ្លួនសម្លាប់ប្រពន្ធព្រោះប្រពន្ធលួចមានសហាយ៕
Source: Kampuchea Thmey Daily
0 Comments