អតីតរដ្ឋអាជ្ញាសហព័ន្ធជិត៤០០នាក់បាននិយាយនៅក្នុងលិខិតរួមមួយកាលពីថ្ងៃចន្ទថា ភស្តុតាងនៅក្នុងរបាយការណ៍របស់លោក Mueller នឹងនាំឲ្យមានការចោទប្រកាន់ពីបទរាំងស្ទះយុត្តិធម៌ប្រឆាំងលោក Donald Trump ប្រសិនបើគាត់មិនមែន ជាប្រធានធិបតី។ លិខិតនេះបាននិយាយថា ភស្តុតាងនៅក្នុងការស៊ើបអង្កេតរបស់រដ្ឋអាជ្ញាពិសេសលោក Robert Mueller បានបង្ហាញថា ការរាំងស្ទះគឺត្រូវបានប្រព្រឹត្តឡើងយ៉ាងលើសលុប។
បច្ចុប្បន្ននេះ គោលនយោបាយរបស់ក្រសួងយុត្តិធម៌បានហាមឃាត់ការចោទប្រកាន់ប្រឆាំងប្រធានាធិបតីដែលកំពុងកាន់តំណែង។ប៉ុន្តែលិខិតនោះហាក់ដូចជាបន្ថែមកិច្ចខិតខំរបស់អ្នកប្រជាធិបតេយ្យក្នុងសភាឲ្យរៀបចំសវនាការស្ដីពីអាកប្បកិរិយារបស់លោក Trump ហើយថែមទាំងអាចចាប់ផ្តើមដំណើរការប្តឹងចោទប្រកាន់ប្រឆាំងនឹងមេដឹកនាំគណបក្សសាធារណរដ្ឋរូបនេះផងដែរ។
រដ្ឋអាជ្ញាបាននិយាយថា “យើងម្នាក់ៗជឿ ថាការប្រព្រឹត្តរបស់ លោកប្រធានាធិបតី Trump ដែលត្រូវបានពិពណ៌នានៅក្នុងរបាយការណ៍របស់រដ្ឋអាជ្ញាពិសេសលោក Robert Mueller នឹងនាំឲ្យមានការចោទប្រកាន់ពីបទរាំងស្ទះយុត្តិធម៌ជាច្រើន”។ កាលពីព្រឹកថ្ងៃចន្ទ គណៈធម្មាធិការតុលាការយុត្តិធម៌សភាបាននិយាយ ថាខ្លួនកំពុងត្រៀមប្រកាស ថាអគ្គរដ្ឋអាជ្ញាលោក Bill Barr មានការមើលងាយដោយសារតែការ មិនផ្ដល់ឲ្យពួកគេនូវកំណែមិនកែសម្រួលនៃរបាយការណ៍របស់លោក Mueller រួមជាមួយភស្តុតាងជាមូលដ្ឋាន។
របាយការណ៍៤៤៨ទំព័ររបស់ លោក Mueller ស្ដីពីការស៊ើបអង្កេតរយៈពេលជិតពីរឆ្នាំចូលទៅក្នុងការជ្រៀតជ្រែករបស់រុស្ស៊ីក្នុងការបោះឆ្នោតដែលបានបញ្ចប់នៅចុងខែមីនាបានបង្ហាញចេញនូវករណីជាច្រើនដែលលោក Trump ហាក់ដូចជាព្យាយាមរារាំងការស៊ើបអង្កេតនេះ។ ប៉ុន្តែលោក Mueller ដែលបានកត់សម្គាល់គោលនយោបាយរបស់ក្រសួងយុត្តិធម៌ដែលថាប្រធានាធិបតីកំពុងកាន់តំណែងមិនអាចត្រូវបានចោទប្រកាន់នោះគឺបានសម្រេចចិត្តមិនបញ្ជាក់ទៅលើថាតើឧក្រិដ្ឋកម្មនេះត្រូវបានប្រព្រឹត្តដែរឬអត់៕ AFP
Source: Kampuchea Thmey Daily
0 Comments