ភ្នំពេញ ៖ បុរសម្នាក់ ត្រូវបានចៅក្រមតុលាការ ចេញដីកាសម្រេចឃុំខ្លួនដាក់ពន្ធនាគារជាបណ្ដោះអាសន្ន ក្រោមការចោទប្រកាន់ ពីបទឆបោក ពាក់ព័ន្ធករណីធ្វើត្រាប់ជាសំឡេងរបស់ថ្នាក់ដឹកនាំបង្គាប់បញ្ជា។
ជនត្រូវចោទ ឈ្មោះ រ៉ែម គង់ ហៅដារ៉ា អាយុ៤០ឆ្នាំ រស់នៅភូមិ ឃុំត្រពាំងស្រែ ស្រុកមេសាង ខេត្តព្រៃវែង ធ្លាប់ជាប់គុក ពីបទឆបោក។
រ៉ែម គង់ ត្រូវបានសមត្ថកិច្ចនាយកដ្ឋានប្រឆាំងបទល្មើសបច្ចេកវិទ្យាចាប់ខ្លួន ពាក់ព័ន្ធនឹងករណី ឆបោក ដោយការទូរស័ព្ទ ក្លែងសំឡេងជាឈ្មោះ ថ្នាក់ដឹកនាំរាជរដ្ឋាភិបាល ទៅប្រព្រឹត្តិអំពើឆបោកទៅលើមន្ត្រីរាជការ និងបណ្តាឧកញ៉ាមួយចំនួន ដោយឲ្យចូលរួមថវិកាឧបត្ថម្ភដល់ការកសាងសមិទ្ធផល ដូចជា សាលារៀន វត្តអារាម និងសន្យាធ្វើការផ្តល់ជាប័ណ្ណសរសើរ មេដាយផ្សេងៗ។
នាយកដ្ឋានប្រឆាំងបទល្មើសបច្ចេកវិទ្យា បានកសាងសំណុំរឿងបញ្ជូនទៅតុលាការ ហើយតំណាងអយ្យការបានចោទប្រកាន់ ពីបទឆបោក ហើយចៅក្រមស៊ើបសួរ នៃសាលាដំបូងរាជធានី ឈ្មោះ រស់ ពិសិដ្ឋ បានចេញដីកាបង្គាប់ឲ្យឃុំខ្លួនបណ្ដោះអាសន្ន នៅក្រោមបទឆបោក មានស្ថានទម្ងន់ទោស៕
Source: Kampuchea Thmey Daily
0 Comments