ភ្នំពេញ ៖ រដ្ឋបាលរាជធានីភ្នំពេញ បានបន្តផ្សព្វផ្សាយការផ្តល់សេវារដ្ឋបាលលើវិស័យពាណិជ្ជកម្មតាមរយៈអង្គភាពច្រកចេញចូលតែមួយ រាជធានីភ្នំពេញ នារសៀលថ្ងៃទី៣ឧសភា បន្ទាប់ពីបានផ្សព្វផ្សាយរួចមកហើយនូវវិស័យជាច្រើនកន្លងមក។
លោក ហួត ហៃ អភិបាលរងរាជធានីភ្នំពេញបានលើកឡើងថា រដ្ឋបាលរាជធានីភ្នំពេញបានអញ្ជើញអស់លោក លោកស្រីដែលធ្វើអាជីវកម្មក្នុងវិស័យពាណិជ្ជកម្មមកផ្សព្វផ្សាយនាពេលនេះ ក្នុងគោលបំណងឲ្យបងប្អូនបានយល់ដឹងពីយន្តការច្រកចេញចូលតែមួយនៅរដ្ឋបាលរាជធានីភ្នំពេញ។
លោកបន្តថា ច្រកចេញចូលតែមួយ គឺជាកន្លែងប្រមូលផ្តុំការផ្តល់សេវារដ្ឋបាលនៅកន្លែងតែមួយតាមនិតិ សាមញ្ញប្រកបដោយគុណភាព ប្រសិទ្ធភាព ប្រសិទ្ធផល តម្លាភាព និងគណនេយ្យភាព។លុបបំបាត់អំពើពុករលួយ ឬការបង់ប្រាក់ខុសច្បាប់កំណត់ កាត់បន្ថយការលំបាករបស់បងប្អូនប្រជាពលរដ្ឋក្នុងការសុំច្បាប់អាជីវកម្មណាមួយ។
ជាមួយគ្នានេះដែរ លោកស្រី មួក យុវលក្ខ័ ប្រធានអង្គភាពច្រកចេញចូលតែមួយរាជធានីភ្នំពេញ បានលើកឡើងពីនីតិវិធី នៃការសុំសេវា,រយៈពេល នៃការផ្តល់សេវា និង តម្លៃដែលត្រូវបង់នៅអង្គភាពច្រកចេញចូលតែមួយ។ ជាពិសេស ស្នើសុំឲ្យម្ចាស់អាជីវកម្មអញ្ជើញមកដោយផ្ទាល់មិនចាំបាច់មានអ្នករត់ការក្នុងការសុំសេវានៅច្រកចេញចូលតែមួយរាជធានីភ្នំពេញ។
លោកស្រីក៏បានលើកឡើងពីនីតិវិធីពាក់ព័ន្ធនឹងការចេញលិខិតអនុញ្ញាតប្រកបអាជីវកម្មលោហៈធាតុត្បូងថ្ម មានតម្លៃជាគ្រឿងអលង្ការនៅរាជធានីភ្នំពេញ,នៅក្រៅ និងក្នុងផ្សារនិងលិខិតអនុញ្ញាត បិទស្លាកថ្លៃជារូបិយប័ណ្ណបរទេសជាដើម៕
Source: Kampuchea Thmey Daily
0 Comments