អង្គការសុខភាពពិភពលោកបាននិយាយកាលពីថ្ងៃសុក្រថា មនុស្សយ៉ាងតិច៣៩២នាក់ត្រូវបានសម្លាប់និង១,៩៣៦នាក់រងរបួសចាប់តាំងពីបុរសខ្លាំង Khalifa Haftar បើកការវាយលុកមួយនៅរដ្ឋធានីរបស់ប្រទេសលីប៊ីកាលពីខែមុន។
យោងតាមស្ថាប័នមួយទៀតរបស់អង្គការសហប្រជាជាតិគឺអង្គការសម្របសម្រួលកិច្ចការមនុស្សធម៌ (OCHA) បាននិយាយថា មនុស្សជាង៥០,០០០នាក់ត្រូវផ្លាស់ទីលំនៅដោយសារតែលទ្ធផលដោយផ្ទាល់នៃជម្លោះប្រដាប់អាវុធដ៏ខ្លាំងក្លានៅក្នុងទីក្រុងទ្រីប៉ូលី។
OCHA បាននិយាយកាលពីថ្ងៃសុក្រនៅលើបណ្តាញសង្គម Twitter ថា “យើងព្រួយបារម្ភអំពីតួលេខនៃការភៀសខ្លួន”។
កងទ័ពជាតិលីប៊ី (LNA) របស់លោក Haftar បានចាប់ផ្តើមការវាយលុកប្រឆាំងនឹងរដ្ឋាភិបាលជាតិ (GNA) ដែលមានមូលដ្ឋាននៅទីក្រុងទ្រីប៉ូលីកាលពីថ្ងៃទី៤ខែមេសា។
ចាប់តាំងពីពេលនោះមក កងកម្លាំងដែលស្មោះត្រង់នឹង GNA បានចាប់ផ្តើមការវាយលុកតបតដែលជាហេតុនាំឲ្យមានភាពជាប់គាំងនៅលើដីនៅជាយក្រុងភាគខាងត្បូង។
លោក Othman Abdel Jalil ដែលជារដ្ឋមន្ត្រីអប់រំរបស់ GNA និងជាប្រធានគណៈកម្មាធិការវិបត្តិរបស់រដ្ឋាភិបាលបាននិយាយកាលពីថ្ងៃព្រហស្បតិ៍ថា មនុស្សចំនួន៥៥,០០០នាក់ត្រូវបានជម្លៀសចេញ។
លោក Jalil បាននិយាយថា មជ្ឈមណ្ឌលទទួលមនុស្សចំនួន៤០កន្លែងនិងសាលារៀនចំនួន២៧កន្លែងបានបើកទ្វារដើម្បីស្វាគមន៍អ្នកដែលត្រូវការ។
យោងតាមទីភ្នាក់ងារមនុស្សធម៌បានឲ្យដឹងថា ជនស៊ីវិលភាគច្រើនដែលបានគេចចេញពីការប្រយុទ្ធគ្នាបានរកឃើញជម្រកជាមួយសាច់ញាតិឬមិត្តភក្តិដោយគ្មានការចុះឈ្មោះជាមួយអាជ្ញាធរ៕ AFP
Source: Kampuchea Thmey Daily
0 Comments