ក្រុង​សេ​អ៊ូ​ល ​៖ កូរ៉េខាងជើង​បាញ់​គ្រាប់ផ្លោង​រយៈ​ចម្ងាយ​ខ្លី

យោធា​កូរ៉េខាងត្បូង​បាន​និយាយថា ប្រទេស​កូរ៉េខាងជើង​ បាន​បាញ់​គ្រាប់ផ្លោង​ចូលទៅក្នុង​សមុទ្រ​នៅ​ថ្ងៃ​សៅរ៍​នៅក្នុង​អ្វីដែល​អាចជា​ការបាញ់​មី​ស៊ី​ល​រយៈ​ចម្ងាយ​ខ្លី​លើកដំបូង​របស់​ក្រុង​ព្យុងយ៉ាង​ក្នុង​រយៈពេល​ជាង​មួយឆ្នាំ​មកនេះ​។​

នាយអគ្គសេនាធិការ​កូរ៉េខាងត្បូង (JCS) បាន​និយាយ​នៅក្នុង​សេចក្តីថ្លែងការណ៍​មួយ​ថា “​កូរ៉េខាងជើង​បាន​បាញ់​គ្រាប់ផ្លោង​រយៈ​ចម្ងាយ​ខ្លី​មួយចំនួន​ចេញពី​ឧបទ្វីប Hodo នៅ​ជិត​ទីក្រុង​ឆ្នេរសមុទ្រ​ភាគ​ខាងកើត Wonsan ឆ្ពោះទៅកាន់​ទិសនិរតី​ពី​ម៉ោង​៩:០៦​នាទី​ព្រឹក​ដល់​ម៉ោង​៩:២៧​នាទី​ព្រឹក​ថ្ងៃនេះ​”​។​

JCS បាន​បន្ថែមថា គ្រាប់ផ្លោង​ទាំងនេះ​បានធ្វើ​ដំណើរ​ពី​៧០​ទៅ​២០០​គីឡូម៉ែត្រ​ឆ្ពោះទៅ​សមុទ្រ​ខាងកើត​ដែល​ក៏​ត្រូវបាន​គេ​ស្គាល់​ផងដែរ​ថា​ជា​សមុទ្រ​ជប៉ុន​។​

នៅក្នុង​សេចក្តីថ្លែងការណ៍​មុន​មួយ​, JCS បាន​និយាយថា ទីក្រុង​ព្យុងយ៉ាង​បាន​បាញ់​មី​ស៊ី​ល​រយៈ​ចម្ងាយ​ជិត​ដែល​មិន​ស្គាល់​អត្តសញ្ញាណ​មួយ​គ្រាប់​។​

ការបាញ់​មី​ស៊ី​ល​ចុងក្រោយ​បំផុត​របស់​កូរ៉េខាងជើង​គឺ​នៅក្នុង​ខែវិច្ឆិកា​ឆ្នាំ​២០១៧ ។​
​ការបាញ់​ចុងក្រោយ​បំផុត​នេះ​បាន​កើតឡើង​មួយថ្ងៃ​បន្ទាប់ពី​រដ្ឋមន្ត្រីការបរទេស​កូរ៉េខាងត្បូង​លោកស្រី Kang Kyung-wha បាន​និយាយថា ទីក្រុង​ព្យុងយ៉ាង​គួរតែ​បង្ហាញ​សកម្មភាព​រំសាយ​អាវុធ​នុយក្លេអ៊ែរ​ដែល​អាច​មើលឃើញ ច្បាស់លាស់​និង​មាន​ប្រសិទ្ធិភាព​បើសិនជា​ខ្លួន​ចង់បាន​ការបន្ធូរបន្ថយ​ទណ្ឌកម្ម​។​

ទីក្រុង​វ៉ាស៊ីនតោន​និង​ព្យុងយ៉ាង​បាន​ស្ថិតក្នុង​ភាព​តានតឹង​ចាប់តាំងពី​ការដួលរលំ​នៃ​កិច្ចប្រជុំ​កំពូល​មួយ​រវាង​មេដឹកនាំ​កូរ៉េខាងជើង​លោក​គីម​ជុង​អ៊ុន​និង​ប្រធានាធិបតី​អាមេរិក​លោក​ដូ​ណា​ល់​ត្រាំ​នៅក្នុង​ខែកុម្ភៈ​។​

គួរ​បញ្ជាក់ថា កូរ៉េខាងជើង​មិនបាន​ធ្វើតេស្ត​មី​ស៊ី​ល​ឬ​នុយក្លេអ៊ែរ​ណាមួយ​ទេ​កាលពី​ឆ្នាំមុន​នៅពេល​លោក​គីម​ជុង​អ៊ុន​បាន​ចូលរួម​កិច្ចប្រជុំ​ជា​ប្រវត្តិសាស្ត្រ​លើកដំបូង​របស់លោក​ជាមួយ​មេដឹកនាំ​អាមេរិក​និង​កូរ៉េខាងត្បូង​៕ AFP

​

Source: Kampuchea Thmey Daily