ភ្នំពេញ ៖ នៅព្រឹកថ្ងៃទី៣ ខែឧសភា លោកចេង មុនីរ៉ា អភិបាលនៃគណៈអភិបាលខណ្ឌច្បារអំពៅបានដឹកនាំមន្ត្រីជំនាញចុះទៅពិនិត្យមើលស្ថានភាពនិងទីតាំងព្រែកបារាំងដែលត្រូវសាងសង់បង្ហើយ។
លោកចេង មុនីរ៉ា បានមានប្រសាសន៍ថា ផ្លូវព្រែកបារាំងនេះ គឺនឹងត្រូវសាងសង់បង្ហើយឲ្យផុតដីព្រែកចាស់ដែលនៅសល់មិនដល់២០០ម៉ែត្រនោះទេ។ ការសម្រុកសាងសង់បង្ហើយនេះគឺសម្រាប់ឲ្យបងប្អូនប្រជាពលរដ្ឋ ដែលរស់នៅភូមិបឹងឈូក បានធ្វើដំណើរងាយស្រួលជាងផ្លូវចាស់ដែលមានទទឹងតូចនិងលំបាកបំផុតពេលមានគ្រោះអគ្គិភ័យកើតឡើង។
លោកអភិបាលខណ្ឌច្បារអំពៅបានបន្តថា ពេលនេះអ្នកជំនាញកំពុងចុះសិក្សាដើម្បីសាងសង់បង្ហើយនិងពិនិត្យមើលប្រព័ន្ធលូអមសង្ខាងផ្លូវក្រែងមានកកស្ទះសំរាម ព្រោះជិតដល់រដូវវស្សាទៅហើយ។ ក្នុងឱកាសនោះដែរ លោកអភិបាលខណ្ឌក៏បានជួបសំណេះសំណាលជាមួយបងប្អូនប្រជាពលរដ្ឋដែលរស់នៅខាងកើតវិទ្យាល័យច្បារអំពៅដើម្បីចង់ដឹងពីសុខទុក្ខនិងការរស់នៅរបស់ប្រជាពលរដ្ឋ។
ខណៈនោះ ប្រជាពលរដ្ឋបានសំដែងនូវក្តីរីករាយពេលបានឃើញសកម្មភាពលោកចេង មុនីរ៉ា អភិបាលនៃគណៈអភិបាលខណ្ឌច្បារអំពៅ ដែលលោកបានជំរុញឲ្យអ្នកជំនាញជួយពន្លឿនក្នុងការសាងសង់ផ្លូវលើព្រែកបារាំងឲ្យបានរួចរាល់ដើម្បីឲ្យប្រជាពលរដ្ឋលោកមានផ្លូវធំទូលាយបានប្រើប្រាស់ហើយបើសាងសង់ផ្លូវរួចរាល់គឺហាងឆេងដីរបស់ប្រជាពលរដ្ឋនិងឡើងខ្ពស់ដែលមិននឹកស្មានដល់៕
Source: Kampuchea Thmey Daily
0 Comments