បន្ទាយមានជ័យ ៖ ក្មួយស្រី ឈ្មោះ រិម ស្រីនិច រស់នៅស្រុកមង្គលបូរី ខេត្តបន្ទាយមានជ័យ ជាសិស្សថ្នាក់ទី១២B នៃវិទ្យាល័យមង្គលបូរី ខេត្តបន្ទាយមានជ័យ។ ក្មួយស្រីបានប្រឡងជាប់សិស្សពូកែទូទាំងប្រទេសផ្នែកអក្សរសិល្ប៍ខ្មែរ ដោយទទួលបានចំណាត់ថ្នាក់លេខ៤ ទោះស្ថានភាពគ្រួសាររបស់ក្មួយស្រីក្រីក្រលំបាកមែនទែន អាចនិយាយបានថា រកព្រឹកខ្វះល្ងាច រកល្ងាចខ្វះព្រឹក ព្រោះឪពុកជាកម្មករ រីឯម្តាយស៊ីឈ្នួលបោកខោអាវឲ្យគេ យ៉ាងណាក្តី ក្មួយស្រីមិនលះបង់ការសិក្សានេះចោលឡើយ ក្មួយស្រីខិតខំប្រឹងប្រែងរៀនសូត្រ រហូតទទួលបានលទ្ធផលជាសិស្សពូកែថ្នាក់ជាតិផ្នែកអក្សរសិល្ប៍ខ្មែរ ហើយជាសិស្សពូកែតំណាងឲ្យខេត្តបន្ទាយមានជ័យតែម្នាក់គត់ ដែលទទួលបានចំណាត់ថ្នាក់ល្អជាងគេប្រចាំឆ្នាំនេះ។ ដោយសារតែក្មួយស្រីមានជីវភាពក្រីក្រពេក ក្រុមគ្រួសារដាច់ចិត្តធ្វើការបង្ហោះតាមហ្វេសប៊ុករកជំនួយ ដើម្បីឲ្យកូនរបស់ខ្លួនបន្តការសិក្សាទៅមុខឲ្យបានជោគជ័យ។
ក្រោយពីឃើញសារបង្ហោះ នៅលើបណ្តាញសង្គមហ្វេកប៊ុក ពីការតស៊ូរៀនសូត្ររបស់សិស្សស្រីរូបនោះ លោក ខៀវ កញ្ញារីទ្ធិ រដ្ឋមន្ត្រី ក្រសួងព័ត៌មាន បានសរសេរសារបង្ហោះ នៅលើគណនីរបស់គាត់ប្រកាសផ្តល់ថវិកា ១,០០០,០០០រៀល ដើម្បីជាការលើកទឹកចិត្តឲ្យនាងខិតខំតស៊ូ រៀនសូត្រ បន្តទៀត។
ក្នុងនោះគណៈគ្រប់គ្រង លោកគ្រូ អ្នកគ្រូ សិស្សានុសិស្ស នឹងរៀបចំពិធីប្រគល់រង្វាន់លើកទឹកចិត្ត ដល់កូនស្រី រឹម ស្រីនិច ដែលបានប្រឡងជាប់ ចំណាត់ថ្នាក់លេខ៤ តាមលទ្ធភាពដែលសាលាអាចធ្វើទៅបានផងដែរ។
ក្នុងនោះ ក្រុមគ្រួសាររបស់ក្មួយស្រីបានធ្វើការអំពាវនាវបងប្អូនដែលមានធនធាន មេត្តាជួយដល់កូនរបស់ខ្លួនតាមលទ្ធភាពផង ព្រោះកម្ររកបានក្មេងណា គ្រួសារមានជីវភាពក្រីក្រហើយ ខិតខំរៀនសូត្រក្លាយទៅជាសិស្សពូកែណាស់ នេះជាធនធានមនុស្សដ៏ល្អមួយដែលថ្នាក់ដឹកនាំត្រូវចាប់អារម្មណ៍៕
Source: Kampuchea Thmey Daily
0 Comments