ស្វាយរៀង ៖ គ្រូពេទ្យអត់សាលា សល់ពីជំនាន់ប៉ុលពតម្នាក់ ត្រូវបានសមត្ថកិច្ចនគរបាលឃាត់ខ្លួនភ្លាម ក្រោយពីគាត់បានចាក់ថ្នាំអោយអ្នកភូមិម្នាក់ដែលឈឺបំពង់ក ហើយគ្រាន់តែដកម្ជុលផុត អ្នកជំងឺប្រកាច់តូងស្លាប់ភ្លាមតែម្ដង។
ហេតុការណ៍នេះ បានកើតឡើងកាលពីវេលាម៉ោង១២ថ្ងៃត្រង់ ថ្ងៃទី៣ ខែឧសភា ឆ្នាំ២០១៩ នៅចំណុចភូមិសំឡីខាងជើង ឃុំសំឡី ស្រុកកំពង់រោទិ៍ ខេត្តស្វាយរៀង
សមត្ថកិច្ចមូលដ្ឋានបានឲ្យដឹងថា ជនរងគ្រោះមានឈ្មោះ ប៊ុន ម៉ាប់ ភេទប្រុស អាយុ៤៥ឆ្នាំ មានទីលំនៅភូមិឃុំខាងលើ មានអាការៈឈឺបំពង់ក ចំនួនពីរថ្ងៃមកហើយពុំបាត់ ទើបគាត់អោយគ្រួសារហៅគ្រូពេទ្យឯកជនឈ្មោះ ព្រាប សេ ភេទប្រុស អាយុ៦៣ឆ្នាំ មានទីលំនៅភូមិព្រៃម្នាស់ ឃុំសំឡីស្រុកកំពង់រោទិ៍ ដែលជាគ្រូពេទ្យសល់ពីជំនាន់ប៉ុលពត មិនដែលចូលរៀនសាលាពេទ្យណាមួយទេក្នុងជីវិតរបស់គាត់ មកចាក់ថ្នាំឲ្យ ខណៈពេលដែលពេទ្យមកដល់បានបូមថ្នាំមួយសឺរ៉ាំង ហើយចាក់ទៅលើជនរងគ្រោះឈ្មោះ ប៊ុន ម៉ាប់ មិនទាន់ទាំងអស់ពីសឺរ៉ាំងផង ស្រាប់តែជនរងគ្រោះមានអាការៈរមាស់ក្រហល់ក្រហាយ ហើយក៏ប្រកាច់តូងដាច់ខ្យល់ស្លាប់ភ្លាមតែម្ដង រកតែអ្នកភូមិជួយមិនទាន់។
ឃើញសភាពស្លន់ស្លោដូច្នេះ គ្រូពេទ្យរៀបចំបង្វេចចាកចេញពីកន្លែងកើតហេតុ តែត្រូវអ្នកភូមិឃាត់ដំណើរ ហើយក៏ប្រគល់អោយនគរបាលក្នុងពេលនោះទៅ។
សមត្ថកិច្ចបានឲ្យដឹងទៀតថា មូលហេតុដែលបណ្តាលឲ្យជនរងគ្រោះស្លាប់ដោយសារប្រតិកម្មថ្នាំ។ពាក់ព័ន្ធករណីគ្រូពេទ្យចាក់ថ្នាំស្លាប់អ្នកជំងឺនេះ បើតាមប្រជាពលរដ្ឋនៅឃុំសំឡី បានឲ្យដឹងថា គ្រូពេទ្យឈ្មោះ ព្រាប សេ គាត់ចេះជំនាញពេទ្យនេះ ពុំមានសាលាច្បាស់លាស់នោះទេ ដោយគាត់ចេះចាក់ថ្នាំតាំងពីសម័យប៉ុលពតមកម្ល៉េះ ហើយបន្តអាជីពនេះ រហូតដល់បច្ចុប្បន្ន។ រយៈកាលកន្លងមកធ្លាប់ ត្រូវបានមន្ទីរជំនាញហៅមកអប់រំផងដែរ តែគាត់នៅតែដើរព្យាបាល គេដដែលទើបភ្លាត់ស្នៀតចាក់ថ្នាំ បណ្តាលឲ្យស្លាប់មនុស្សតែម្តង ។
អ្នកភូមិថាគាត់ព្យាបាលមិនគិតថា មនុស្សសត្វនោះទេអោយតែហៅគាត់ គាតមកចាក់ថ្នាំអោយមិនរើសមុខទាំងអស់ទាំងសត្វគោ ក្របី ជ្រូក សេះ មាន់ ទា និងមនុស្សចាស់ ក្មេង ប្រុស ស្រី ឲ្យតែត្រូវការគាត់ចាក់បានទាំងអស់៕
Source: Kampuchea Thmey Daily
0 Comments