ភ្នំពេញ ៖ ក្មេងប្រុសម្នាក់ ក្នុងវ័យ៩ឆ្នាំ ដែលសព្វថ្ងៃស៊ីឈ្នួល លក់ទឹកកក ឲ្យឪពុកធំ ដើម្បីបានលុយផ្ញើទៅម្តាយនៅឯខេត្ត តែសំណាងបានលោកអនុប្រធានផ្សារច្បារអំពៅ ជួយសុំលោកនាយកសាលាបឋមសិក្សាច្បារអំពៅបានចូលរៀន។
លោក គ្រី ហ៊ុច អនុប្រធានផ្សារច្បារអំពៅបានប្រាបកម្ពុជាថ្មីថា កាលពីរសៀលថ្ងៃទី៦ឧសភា លោកបានជួបក្មេងប្រុសម្នាក់មានអាយុក្រោម១០ឆ្នាំ តែងឈរលក់ទឹកកកក្បែររបងមន្ទីរពេទ្យបង្អែកខណ្ឌច្បារអំពៅជារៀងរាល់ថ្ងៃ ធ្វើឲ្យលោកចាប់អារម្មណ៍ រួចសាកសួរទៅ គឺក្មេងប្រុសរូបនេះចង់ចូលរៀនប៉ុន្តែគ្រួសារគ្មានលទ្ធភាព។
លោក គ្រី ហ៊ុច បានបន្តថា ក្មេងប្រុសរូបនេះ ត្រូវបានឪពុកធំយកមកចិញ្ចឹមតាំងពីតូច ដោយឲ្យជួយលក់ទឹកកកដុំ។ ហើយសព្វថ្ងៃនេះ ក្មួយប្រុស ក៏គ្មានសំបុត្រកំណើតបញ្ជាក់ពីថ្ងៃកើត និងមានឪពុកម្ដាយឈ្មោះអីដែរ។ ដូច្នេះហើយ ទើបឪពុកធំមិនហ៊ាននាំយកទៅសាលា ព្រោះគ្មានអ្វីបញ្ជាក់ពីទីតាំងកំណើត។
លោកអនុប្រធានផ្សារច្បារអំពៅបានបញ្ជាក់ថា ដោយមានការអាណិតអាសូរ លោកបានដឹកដៃក្មេងប្រុសខាងលើ ទៅសុំលោកនាយកសាលាបឋមសិក្សាច្បារអំពៅ ហើយលោកនាយកបានអនុញ្ញាតឲ្យចូលរៀន និងឲ្យឪពុកមាក្មេងប្រុសធ្វើសំបុត្រឲ្យក្មេងប្រុសនៅមូលដ្ឋានរបស់ខ្លួន ដើម្បីបញ្ជាក់ពីប្រភពកំណើត ព្រោះមនុស្សគ្រប់រូបមិនអាចគ្មានសំបុត្រកំណើតនោះឡើយ។
លោក គ្រី ហ៊ុច បានបញ្ជាក់ថា លោកក៏សំដែងការអរគុណដល់លោកនាយកសាលាបឋមសិក្សាច្បារអំពៅ ដែលបានអនុញ្ញាតឲ្យក្មេងប្រុសរូបនេះបានចូលរៀន ខណៈដែលរូបគេមិនដែលបានចូលសាលាសោះ៕
Source: Kampuchea Thmey Daily
0 Comments