មេខ្លោង​នៃ​ការវាយប្រហារ​នៅ​ស្រីលង្កា​ បាន​ប្រើប្រាស់​បន្ទប់​សន្ទនា​តាម​អ៊ីនធើណិត​ដើម្បី​បញ្ចុះបញ្ចូល​អ្នក​បំផ្ទុះ​គ្រាប់បែក​អត្តឃាត

មេដឹកនាំ​សហគមន៍​មូស្លីម​បាន​និយាយ​ថា ខណៈ​ពេល​ ដែល​មេខ្លោង​នៃ​ការវាយប្រហារ​អត្តឃាត​អំឡុង​ពិធីបុណ្យ Easter ក្នុង​ប្រទេស​ស្រីលង្កា​លោក Zahran Hashim បាន​ប្រើប្រាស់​ប្រព័ន្ធ​ផ្សព្វផ្សាយ​សង្គម​ដើម្បី​អំពាវនាវ​ជា​សាធារណៈ​ចំពោះ​ការស្លាប់​របស់​អ្នក​មិនមែនជា​ជន​មូស្លីម​នោះ គាត់​បានធ្វើការ​អស់​រយៈពេល​ជាច្រើន​ខែ​នៅក្នុង​បន្ទប់​សន្ទនា​តាម​អ៊ី​នធើ​ណិ​ត​ជា​លក្ខណៈ​ឯកជន​ដើម្បី​បញ្ចុះបញ្ចូល​យុវជន​ចំនួន​៦​នាក់​ឲ្យ​ពលី​ជីវិត​របស់​ពួកគេ។

គ្រិស្ត​សាសនិក​និង​ភ្ញៀវទេសចរ​បរទេស​បាន​រងគ្រោះ​យ៉ាងធ្ងន់ធ្ងរ​នៅក្នុង​ការវាយប្រហារ​លើ​ព្រះវិហារ​បី​កន្លែង​និង​សណ្ឋាគារ​បី​កន្លែង​ដែល​បានសម្លាប់​មនុស្ស​ចំនួន​២៥៧​នាក់ ​ប៉ុន្តែ​សហគមន៍​មូស្លីម​របស់​ប្រទេស​ស្រីលង្កា​ក៏មាន​ការភ័យខ្លាច​ផងដែរ​និង​កំពុង​ពិនិត្យមើល​សាវតារ​របស់លោក Hashim និង​អ្នកមាន​ជំនឿ​ជី​ហាដ​របស់គាត់​។​

ប៉ូលិស​និង​បងប្អូន​មូស្លីម​បាន​និយាយថា លោក Hashim ដែល​ស្លាប់​ក្នុងការ​វាយប្រហារ​លើ​សណ្ឋាគារ Shangri-La កាលពី​ថ្ងៃទី​២១ ​ខែមេសា​បាន​បំផុស​ឲ្យ​បងប្អូន​ប្រុស​មាន​ទ្រ​ព​សម្បត្តិ​ឈ្មោះ Ilham Ibrahim និង Inshaf Ibrahim ចូលរួម​ក្នុងការ​វាយប្រហារ​រប​ស់គា​ត់​។​

ប៉ូលិស​ស៊ើបអង្កេត​បាន​និយាយថា “​យើង​សង្ស័យថា បងប្អូន​ប្រុស​ទាំងពីរ​នាក់​នេះ​បាន​ប្រើប្រាស់​ប្រាក់​ពី​អាជីវកម្ម​គ្រឿងទេស​របស់​ពួកគេ​ដើម្បី​ផ្គត់ផ្គង់​សម្រាប់​ការ​បំផ្ទុះ​គ្រាប់បែក​។ វា​ហាក់បីដូចជា​ថា ការបញ្ចុះ​បញ្ចូល​គឺធ្វើឡើង​តាមរយៈ​អ៊ី​ន​ធើ​ណិ​ត​ដូចជា Facebook និង YouTube ជាដើម​”​។

លោក R. Abdul Razik មេដឹកនាំ​នៃ​ក្រុម Ceylon Thowheed Jama'ath (CTJ) បាន​និយាយថា “​យើង​ជឿជាក់ថា Zahran បាន​បញ្ចុះបញ្ចូល​មនុស្ស​ទាំងនេះ​ដោយ​ប្រើប្រាស់ Facebook​។ ជាពិសេស​កាលពី​ឆ្នាំមុន គាត់​បាន​អំពាវនាវ​ដោយ​បើកចំហ​សម្រាប់​ការសម្លាប់​មនុស្ស​មិនមែន​ជន​មូស្លីម​”​។​

ក្រុម​អ្នកស៊ើប​អង្កេត​និង​មេដឹកនាំ​សហគមន៍​ជឿជាក់ថា ក្រុម​នេះ​ក៏បាន​ប្រើប្រាស់​សារ​ឯកជន​ក្នុង​ប្រព័ន្ធ​ផ្សព្វផ្សាយ​សង្គម​ដើម្បី​រក្សា​ទំនាក់ទំនង​ដោយ​គ្មាន​ការ​កត់សំគាល់​ពី​អាជ្ញាធរ​ផងដែរ​។​

CTJ និង​ស្ថាប័ន​សំខាន់​នៃ​បព្វជិត​សាសនា​ឥស្លាម​គឺ All Ceylon Jamiyyathul Ulama បាន​ប្រាប់​ឲ្យ​មានការ​បង្កើត​សន្តិសុខ​របស់​ប្រទេស​ស្រីលង្កា​ទៅលើ​លោក Hashim និង​ជំនួយការ​របស់គាត់​ប៉ុន្តែ​បាន​និយាយថា ការព្រមាន​របស់​ពួកគេ​មិនបាន​ទទួល​ការយកចិត្តទុកដាក់​នោះទេ​។​
រដ្ឋាភិបាល​ប្រទេស​ស្រីលង្កា​បានទទួល​ស្គាល់​រួចទៅហើយ​ថា ការព្រមាន​ចារកម្ម​បរទេស​អំពី​ការវាយប្រហារ​នេះ​មិន​ត្រូវបាន​បញ្ជូនទៅ​ឲ្យ​រដ្ឋមន្ត្រី​ឡើយ​៕ AFP

​

Source: Kampuchea Thmey Daily