ប្រធានាធិបតីប្រេស៊ីលលោក Jair Bolsonaro កាលពីថ្ងៃសុក្រ បានលុបចោលគម្រោងចូលរួមក្នុងមហោស្រពមួយនៅទីក្រុងញូវយ៉ក បន្ទាប់ពីក្រុមហ៊ុនជាច្រើនបានដកការឧបត្ថម្ភរបស់ពួកគេហើយមនុស្សរាប់ពាន់នាក់បានទាមទារឲ្យលុបចោលគម្រោងនេះ។
ពិធីជប់លៀងដែលរៀបចំដោយសភាពាណិជ្ជកម្មប្រេស៊ីល-អាមេរិកនៅថ្ងៃទី១៤ខែឧសភាបានបង្កឲ្យមានការរិះគន់យ៉ាងខ្លាំងលើកំណត់ត្រារបស់ប្រធានាធិបតីស្តាំនិយមរូបនេះខណៈចៅហ្វាយក្រុងញូវយ៉កលោក Bill de Blasio បានចាត់ទុកថា លោក Bolsonaro គឺជា “បុរសដែលមានគ្រោះថ្នាក់ម្នាក់”។
អ្នកនាំពាក្យម្នាក់បាននិយាយនៅក្នុងសេចក្តីថ្លែងការណ៍មួយថា លោក Bolsonaro បានសម្រេចចិត្តលុបចោលការធ្វើដំណើរនេះដោយសារតែការវាយប្រហារដោយចេតនាពីអភិបាលក្រុងញូវយ៉កនិងសម្ពាធរបស់ក្រុមហ៊ុនទៅលើអ្នករៀបចំ។
ព្រឹត្តិការណ៍នេះត្រូវបានគេគ្រោងធ្វើឡើងនៅសារមន្ទីរប្រវត្តិសាស្ត្រធម្មជាតិក្នុងទីក្រុងញូវយ៉កមុនពេលវាត្រូវបានប្តូរទីតាំងរៀបចំ។
វាត្រូវបានគេប្តូរទៅសណ្ឋាគារ Marriott Marquis នៅ Times Square ដែលជាកន្លែងក្រុមអ្នកតវ៉ាបានប្រមូលផ្តុំគ្នារាល់យប់នៅខាងក្រៅដើម្បីស្វែងរកការលុបចោលព្រឹត្តិការណ៍នេះទាំងស្រុង។
កាលពីថ្ងៃសុក្រ ក្រុមហ៊ុនអាកាសចរណ៍អាមេរិក Delta, កាសែតអង់គ្លេស Financial Times និងក្រុមហ៊ុនប្រឹក្សាយោបល់ Bain & Company សុទ្ធតែបានបញ្ជាក់ប្រាប់ AFP ថា ពួកគេនឹងមិនឧបត្ថម្ភអាហារពេលល្ងាចដូចដែលបានគ្រោងទុកនោះទេ។
គួរបញ្ជាក់ថា លោក Bolsonaro នឹងត្រូវទទួលពានរង្វាន់បុគ្គលល្បីប្រចាំឆ្នាំនៅឯព្រឹត្តិការណ៍នោះ។
ជារៀងរាល់ឆ្នាំសភាពាណិជ្ជកម្មប្រេស៊ីល-អាមេរិកបានប្រគល់ពានរង្វាន់ដល់ជនជាតិប្រេស៊ីលនិងអាមេរិចក្នុងពិធីជប់លៀងនេះ៕ AFP
Source: Kampuchea Thmey Daily
0 Comments