ក្រុមមន្ត្រីបាននិយាយថា យន្តហោះ Boeing 737 មួយគ្រឿង បានធ្លាក់ចេញពីផ្លូវរត់ចូលទៅក្នុងទន្លេបន្ទាប់ពីការចុះចតបរាជ័យនៅឯស្ថានីយអាកាសរបស់កងទ័ពជើងទឹករដ្ឋ Florida ប៉ុន្តែមិនមានសេចក្តីរាយការណ៍អំពីអ្នកស្លាប់ទេ។
អាជ្ញាធរជើងទឹកបាននិយាយថា យន្តហោះដែលដឹកមនុស្ស១៤៣នាក់រួមទាំងនាវិកមកពីឈូងសមុទ្រ Guantanamo ក្នុងប្រទេសគុយបាផងដែរនោះបានបញ្ចប់ដំណើរក្នុងទឹករាក់នៅជាប់នឹងស្ថានីយអាកាសក្នុងទីក្រុង Jacksonville ដោយអ្នកដំណើរទាំងអស់ត្រូវបានជម្លៀសចេញដោយសុវត្ថិភាព។
ស្ថានីយអាកាសនៃទ័ពជើងទឹក Jacksonville បាននិយាយនៅក្នុងសេចក្តីថ្លែងការណ៍មួយថា “មានអ្នកដំណើរចំនួន១៣៦នាក់និងអាកាសយានិក៧នាក់នៅលើយន្តហោះនោះ”។
ការិយាល័យទីក្រុង Jacksonville បានឲ្យដឹងថា មនុស្សពេញវ័យចំនួន២១នាក់ត្រូវបានបញ្ជូនទៅកាន់មន្ទីរពេទ្យក្នុងស្រុកប៉ុន្តែគ្មាននរណាម្នាក់រងរបួសធ្ងន់ទេ។ អ្នកផ្សេងទៀតត្រូវបានគេព្យាបាលសម្រាប់របួសស្រាលនៅកន្លែងកើតហេតុ។
សន្តិសុខកងទ័ពជើងទឹកនិងបុគ្គលិកឆ្លើយតបបន្ទាន់រួមទាំងអ្នកពន្លត់អគ្គិភ័យប្រហែល៩០នាក់ផងដែរបានចូលរួមនៅកន្លែងកើតហេតុ។
អភិបាលក្រុង Jacksonville លោក Lenny Curry បានបង្ហោះ Twitter ថា “ក្រុមការងារកំពុងធ្វើការដើម្បីគ្រប់គ្រងប្រេងឥន្ធនៈដែលហូរចូលទៅក្នុងទន្លេ St Johns”។
ក្រុមហ៊ុន Boeing បាននិយាយថា ខ្លួនដឹងពីឧបទ្ទវហេតុនេះហើយកំពុងប្រមូលព័ត៌មាន៕ AFP
Source: Kampuchea Thmey Daily
0 Comments