រដ្ឋមន្ត្រីក្រសួងហិរញ្ញវត្ថុ២រូបបាននិយាយថារដ្ឋាភិបាលឥណ្ឌាបានមើលឃើញសង្ឃឹមតិចតួចណាស់ចំពោះអ្នកចេញដេញថ្លៃឱ្យក្រុមហ៊ុន Jet Airways Ltd ដែលកំពុងជាប់បំណុលវ័ណ្ឌកខណៈបុគ្គលិករាប់ពាន់បានទទូចសុំឱ្យរដ្ឋាភិបាលជួយសង្គ្រោះក្រុមហ៊ុននេះឡើងវិញ។
ភាគីជាច្រើនដែលធ្លាប់បង្ហាញការចាប់អារម្មណ៍លើក្រុមហ៊ុន Jet ដែលកំពុងជាប់បំណុលប្រមាណ១,២ពាន់លានដុល្លារនោះពេលនេះបានបរាជ័យក្នុងការដេញថ្លៃដើម្បីស្រោចស្រង់ក្រុមហ៊ុននេះដោយបានត្រូវបានគេមើលឃើញកាន់តែច្បាស់ថាក្រុមហ៊ុនឥណ្ឌាមួយនេះកំពុងដើរទៅរកការក្ស័យធុនក្នុងពេលមិនយូរទៀតឡើយ។
មន្ត្រីមួយរូបបានមានប្រសាសន៍ថា "មើលទៅមានសង្ឃឹមតិចណាស់ដែលអាចជួយសង្គ្រោះ Jet ឱ្យរស់ឡើងវិញបាន"។លោកបានបន្ថែមថាបើមានអ្នកចេញមុខដេញថ្លៃរដ្ឋាភិបាលនៅតែមានឆន្ទៈផ្ដល់ទីតាំងដំណើរការដល់ក្រុមហ៊ុនអាកាសចរណ៍ឯកជនមួយនេះដែលជាបណ្ដោះអាសន្នទីតាំងនេះកំពុងដាក់ឱ្យមានការប្រកួតប្រជែងដេញថ្លៃយក។
នៅក្នុងសំបុត្រមួយផ្ញើជូនលោកនាយករដ្ឋមន្ត្រីដែលត្រូវបានអានដោយទីភ្នាក់ងារ Reuters កាលពីសប្ដាហ៍មុនក្រុមសហជីពពីឡុតរបស់ក្រុមហ៊ុនបានទទូចសុំឱ្យរដ្ឋាភិបាលជួយធ្វើអន្តរាគមន៍និងជួយពន្លឿនដំណើរការដេញថ្លៃសម្រាប់អាកាសចរណ៍មួយនេះ។
គួរបញ្ជាក់ថាក្រុមហ៊ុនហោះហើរ Jet មានយន្តហោះប្រមាណជាង១២០គ្រឿងតែប្រហែលជាងពាក់កណ្ដាលនៃចំនួននេះត្រូវបានលុបពីការចុះបញ្ជីនិងត្រូវបានដកហូតមកវិញដោយម្ចាស់ដែលជួលឱ្យក្រុមហ៊ុន៕ REUTERS
Source: Kampuchea Thmey Daily
0 Comments