រតនគិរី ៖ ប្រជាពលរដ្ឋជនជាតិដើមភាគតិចម្នាក់ បានប្រទះឃើញគ្រាប់យុទ្ធភណ្ឌមិនទាន់ផ្ទុះ១គ្រាប់សេសសល់ពីសម័យសង្គ្រាមរើសដាក់កាផាស្ពាយ យកមកផ្ទះ រួចរាយការណ៍ទៅសមត្ថកិច្ច។
ការប្រទះឃើញគ្រាប់បែកមួយគ្រាប់មិនទាន់ផ្ទុះនេះ កាលពីថ្ងៃទី៣០ ខែមេសា ឆ្នាំ២០១៩កន្លងទៅ ដែលធ្វើឲ្យមានការភ្ញាក់ផ្អើលដល់សមត្ថកិច្ចនគរបាលប៉ុស្តិ៍ក្នុងមូលដ្ឋាន និងប្រជាពលរដ្ឋទូទាំងភូមិឡែ ឃុំលំជ័រ ស្រុកអូរយ៉ាដាវតែម្ដង។
ប្រជាពលរដ្ឋ ដែលរើសគ្រាប់បានរូបនោះ ក៏បានរាយការណ៍ភ្លាមៗទៅ លោក ស្លៃម៉ាន ហាស្សាន់ នាយប៉ុស្ដិ៍ នគរបាលឃុំលំជ័រ លោកនាយប៉ុស្ដិ៍ក៏បានណែនាំចំណុចសំខាន់ៗជាច្រើន ទាក់ទិននឹងគ្រាប់បែក ឲ្យមានការប្រុងប្រយ័ត្នដូចជា យកមកប្រគល់ឲ្យប៉ុស្តិ៍ កុំប៉ះពាល់វា កុំដំកុំដុត ឬដាក់សញ្ញាសំគាល់មួយកន្លែងជៀសវាងបង្កគ្រោះថ្នាក់។ ប៉ុន្តែពលរដ្ឋរូបនោះមានការភ័យពេក ក៏យកគ្រាប់បែកទៅទម្លាក់ចោលក្នុងស្រះមួយកន្លែងទៅវិញ។ នេះបើតាមការឲ្យដឹងពីលោកនាយប៉ុស្ដិ៍ឃុំលំជ័រ លោកស្លៃម៉ាន ហាស្សាន់នៅល្ងាចថ្ងៃទី០៣ ខែឧសភា ឆ្នាំ២០១៩។
លោកអនុសេនីយ៍ទោ ស្លៃម៉ាន ហាស្សាន់ នាយប៉ុស្តិ៍នគរបាលរដ្ឋបាលឃុំលំជ័រ បានឲ្យដឹងទៀតថា ក្រោយពីទទួលព័ត៌មានពីប្រជាពលរដ្ឋនៅក្នុងភូមិឡែ រាយការណ៍តាមទូរស័ព្ទ រួចមក គ្រាប់១២,៧ចំនួន១គ្រាប់នេះ លោកនាយប៉ុស្តិ៍ក៏បានទំនាក់ទំនងទៅអង្គការ MAG ដែលជាអង្គការជំនាញ។
លោកបន្ថែមទៀតថា ក្រោយពីបានទទួលដំណឹងនេះភ្លាម លោកក៏បានទូរស័ព្ទទៅលោក ចាន់ ថន ជាប្រធានក្រុមផ្នែកកម្ទេចគ្រាប់យុទ្ធភណ្ឌមិនទាន់ផ្ទុះ ដើម្បីមកទទួលយកហៅថាអង្គការ MAG។
លោកថា លុះមកដល់ថ្ងៃទី៣ ខែឧសភា ឆ្នាំ២០១៩នេះ ក្រុមអង្គការMAG ដែលដឹកនាំដោយលោក ចាន់ ថន បានចុះទៅ សួរនាំស្ត្រីឈ្មោះ រចំ ញឹម ជនជាតិច្រាយ ដែលបានយកគ្រាប់ប្រភេទអាវុធធុនតូច១២,៧ មកទុកនៅក្នុងផ្ទះរបស់ខ្លួន ដែលបានមកតាមរយៈភ្ជួរដីចម្ការ។ ក្រោយមកលោកបន្តរាវរកបានចំនួន១៦០គ្រាប់ទៀត ស្ថិតក្នុងភូមិឡែ ឃុំលំជ័រ ស្រុកអូរយ៉ាដាវ ខេត្តរតនគិរី ដើម្បីកម្ទេចចោល។
រីឯគ្រាប់បែកដៃប្រភេទ៨២,២ផលិតនៅប្រទេសវៀតណាម ចំនួន១គ្រាប់ គឺបានមកពីឈ្មោះ សិទ្ធិ ភេទប្រុស ទីលំនៅភូមិ/ឃុំខាងលើ ដែលឃើញកប់ដីនៅក្នុងចម្ការ។
ក្រោយពីកម្លាំងប៉ុស្តិ៍បានធ្វើការប្រគល់និងទទួលរួចមក លោក ចាន់ ថន ប្រធានក្រុមកម្ទេចគ្រាប់ EOD3 របស់អង្គការ(MAG) ចល័តគ្រាប់ទាំងអស់នេះ យកទៅទីតាំងកម្ទេចតាមជំនាញរបស់ខ្លួនដោយសុវត្ថិភាព។
ក្នុងនាមលោកនាយប៉ុស្តិ៍ ស្លៃម៉ានហាស្សាន់ ប្រចាំក្នុងមូលដ្ឋានឃុំលំជ័រ ភូមិឡែ ស្រុកអូរយ៉ាដាវលោកសូមអំពាវនាវដល់បងប្អូនប្រជាពលរដ្ឋជាទូទៅសូមបង្កើនការប្រុងប្រយ័ត្នឲ្យបានខ្ពស់បំផុតនៅរាល់ការកាប់គាស់ភ្ជួររស់ដីធ្វើស្រែចម្ការ ប្រទះឃើញគ្រាប់បែក ទោះប្រភេទណាក៏ដោយត្រូវរាយការណ៍ជូនសមត្ថកិច្ចមូលដ្ឋានជៀសវាងការហាមប៉ះពាល់ យកមកកែច្នៃខុសពីបទដ្ឋានបច្ចេកទេសងាយបង្កហានិភ័យដល់អាយុជីវិត៕
Source: Kampuchea Thmey Daily
0 Comments